सरकारच्या नव्या अर्थसाहाय्याकडे दुर्लक्ष करत गुंतवणूकदारांची नफावसुली मुंबई : विक्रमी टप्प्यावर पोहोचलेल्या भांडवली बाजारात गुंतवणूकदारांनी सप्ताहारंभीच नफेखोरीचे धोरण अवलंबिले. सरकारच्या नव्या आर्थिक साहाय्याची दखल घेण्याऐवजी गुंतवणूदारांच्या नफावसुलीचा परिणाम प्रमुख निर्देशांकांवर अधिक जाणवला. मुंबई शेअर बाजाराचा सेन्सेक्स १८९.४५ अंश घसरणीसह ५२,७३५.५९ वर स्थिरावला. तर राष्ट्रीय शेअर बाजाराचा निफ्टी ४५.६५ अंश घसरणीने १५,८१४.७० पर्यंत खाली आला. दोन्ही प्रमुख निर्देशांकांनी सत्रात त्यांच्या विक्रमी टप्प्याला स्पर्श केला होता. नव्या आठवडय़ातील पहिल्या सत्राच्या सुरुवातीपासून भांडवली बाजारात तेजीचे व्यवहार सुरू होते. असे करताना सेन्सेक्स सत्रात ५३,१२६.७३ पर्यंत झेपावला. तर निफ्टी व्यवहारात १५,९१५.६५ वर होता. मुंबई निर्देशांकांने व्यवहारात ५३ हजाराला पुन्हा एकदा गाठले होते. तर निफ्टी या दरम्यान १६ हजाराच्या उंबरठय़ावर होता. भांडवली बाजारात वरच्या टप्प्याला पोहोचलेल्या निर्देशांकांसह अधिक समभाग मूल्याचा मोह गुंतवणूकदारांना आवरता आला नाही. भांडवली बाजार व्यवहार दरम्यानच केंद्र सरकारने जाहीर केलेल्या आर्थिक उपाययोजनांचे स्पष्टीकरण आले. मात्र त्याची फारशी दखल गुंतवणूकदारांनी घेतली नाही. उलट प्रमुख निर्देशांकांची सत्रअखेर शुक्रवारच्या तुलनेत नकारात्मक झाली. सेन्सेक्समध्ये टायटन कंपनी, टीसीएस, एचसीएल टेक, बजाज फिनसव्र्ह, रिलायन्स इंडस्ट्रिीज, अल्ट्राटेक सिमेंट, भारती एअरटेल आदी अधिक फरकाने घसरले. तर डॉ. रेड्डीज्, टाटा स्टील, टेक महिंद्र, सन फार्मा, हिंदुस्थान यूनिलिव्हर काही प्रमाणात घसरले. क्षेत्रीय निर्देशांकांमध्ये ऊर्जा, भांडवली वस्तू, माहिती तंत्रज्ञान, दूरसंचार आदी जवळपास एक टक्क्य़ापर्यंत घसरले. तर पोलाद, आरोग्यनिगा निर्देशांक किरकोळ वाढले. मिड कॅप व स्मॉल कॅप प्रत्येकी जवळपास अर्ध्या टक्क्य़ाने वाढले.
