गुजरात प्रकल्पावर सुझुकीचे वर्चस्व; मारुतीच्या समभागात धास्तीने पडझड

गुजरातेतील मेहसाणा येथे येऊ घातलेल्या नव्या वाहन निर्मिती प्रकल्पावर मुख्य प्रवर्तक सुझुकी मोटर कॉर्पोरेशनचे वर्चस्व असेल, असे मंगळवारी स्पष्ट झाले. जपानची ही कंपनी आपल्या सुझुकी मोटर गुजरात या उपकंपनीद्वारे गुंतवणूक करील. कंपनी मारुती सुझुकीसाठीच ही वाहने येथे तयार करील. कंपनीच्या देशातील तिसऱ्या प्रकल्पाची २०१२ मध्ये घोषणा करण्यात आली.
२०१५-१६ या आर्थिक वर्षांत सुरू होणाऱ्या ७०० एकर जागेवरील प्रकल्पाची वाहननिर्मिती क्षमता पहिल्या टप्प्यात वार्षिक २.५ लाख असेल.
दरम्यान, समूहातील कंपनी ताबा आणि वित्तीय निष्कर्षांचे पडसाद मंगळवारी भांडवली बाजारात उमटले. चालू आर्थिक वर्षांच्या तिसऱ्या तिमाहीत नफ्यात घसघशीत ३६ टक्के वाढ नोंदविणाऱ्या कंपनीचा समभाग मात्र सेन्सेक्सच्या दफ्तरी व्यवहारात १२ टक्क्यांपर्यंत आपटला. दिवसअखेर तो सोमवारच्या तुलनेत ८.१२ टक्क्यांनी रोडावत १,५६३.२० रुपयांवर स्थिरावला.