पुणे : लोकमान्य मल्टिपर्पज को-ऑप सोसायटीला वर्षअखेरीस १४.६३ कोटी रुपयांचा निव्वळ नफा झाल्याचे मंगळवारी पुणे येथे झालेल्या सोसायटीच्या २८ व्या वार्षिक सर्वसाधारण सभेत जाहीर करण्यात आले. सभेत वार्षिक आढावा मांडताना लोकमान्य सोसायटीचे संस्थापक अध्यक्ष किरण ठाकूर यांनी ही घोषणा केली. ‘लोकमान्य’चे मुख्य कार्यालय बेळगाव येथून पुणे, महाराष्ट्रात स्थलांतरित झाल्यानंतरची ही पहिलीच वार्षिक सर्वसाधारण सभा होती. त्यामुळे या सभेला एक वेगळे महत्त्व होते. संस्थापक अध्यक्ष किरण ठाकूर हे सभेच्या अध्यक्षस्थानी, तर सभेसाठी व्यासपीठावर उपाध्यक्ष अजित गरगट्टी, प्रसाद ठाकूर, गजानन धामणेकर, पंढरी परब, सुबोध गावडे, विठ्ठल प्रभू, प्रभाकर पाटकर, सई ठाकुर-बिजलानी आदी संचालक मंडळी तसेच मुख्य वित्तीय अधिकारी वीरसिंग भोसले, मुख्य कार्यकारी अधिकारी अभिजित दीक्षित, पुणे विभागीय व्यवस्थापक सुशील जाधव व ठेवीदार-सभासद लक्षणीय संख्येने उपस्थित होते. सभेपुढे मनोगत मांडताना, आतापर्यंतच्या प्रवासात सोसायटीने अनेक आव्हानांचा सामना करत यशाची नवनवीन शिखरे पादाक्रांत केली याचा ठाकूर यांनी आवर्जून उल्लेख केला तसेच सभासदांच्या विश्वास आणि सहकार्यबद्दल कृतज्ञता त्यांनी व्यक्त केली. केंद्र सरकारने स्थापन केलेल्या स्वतंत्र सहकार मंत्रालयामुळे सहकार क्षेत्राच्या अनेकविध समस्यांचे निराकरण होऊन हे क्षेत्र एक वेगळीच उंची गाठत आहे, असे नमूद करीत त्यांनी सहकार मंत्रालय स्थापनेच्या निर्णयाचे या वेळी कौतुक केले.