मुंबई : आर्थिक डबघाईला आलेल्या आणि एप्रिल २०१८ पासून रिझव्‍‌र्ह बँकेने निर्बंध लादलेल्या सिटी को-ऑपरेटिव्ह बँकेवरील ‘कलम ३५ अ’खालील निर्बंधांना रिझव्‍‌र्ह बँकेने आणखी तीन महिन्यांची मुदतवाढ दिली. ताज्या आदेशाप्रमाणे, १६ जानेवारी २०२३ पर्यंत बँकेवरील निर्बंध कायम राहतील. अर्थात ही मुदतवाढ म्हणजे बँकेच्या आर्थिक स्थितीबाबत मध्यवर्ती बँकेचे समाधान झाले असल्याचे समजले जाऊ नये, असे रिझव्‍‌र्ह बँकेने जारी केलेल्या प्रसिद्धीपत्रकातून स्पष्ट केले आहे. मात्र सिटी बँकेच्या पुनरुज्जीवनासाठी धनवर्षां समूहाकडून २३० कोटी रुपयांच्या गुंतवणुकीसह सुरू असलेल्या प्रयत्नांच्या दृष्टीने हा मोठा दिलासा आहे, असे बँकेचे अध्यक्ष माजी खासदार आनंदराव अडसूळ म्हणाले. सरलेल्या तिमाहीत बुडीत कर्जाची वसुली चांगली सुरू असल्याचे त्यांनी सांगितले.
