मुंबई : जगभरातील भांडवली बाजारातील सकारात्मकतेने विदेशी गुंतवणुकीचा वाढलेला ओघ आणि देशांतर्गत ऑक्टोबरच्या चलनवाढीच्या दिलासादायक आकडेवारीने मंगळवारी स्थानिक बाजारात प्रमुख निर्देशांक ‘सेन्सेक्स’ला नवीन सार्वकालिक उच्चांकावर चढाईचे स्फुरण मिळवून दिले. चढ-उताराच्या हिंदोळे सुरू राहिलेल्या मंगळवारच्या सत्राच्या शेवटच्या तासाभराच्या व्यवहारावर तेजीवाल्यांनी वर्चस्व स्थापित केले आणि परिणामी मुंबई शेअर बाजाराच्या ‘सेन्सेक्स’ने २४८.८४ अंशांची (०.४० टक्के) कमाई करून ६१,८७२.९९ हे नवीन शिखर गाठता आले. अलीकडेच, ११ नोव्हेंबरला स्थापण्यात आलेली ६१,७९५.०४ ही उच्चांकी पातळी यातून मागे टाकली गेली. दिवसभरात हा निर्देशांक ५१९ अंशांच्या फरकाने वर खाली होत राहिला आणि ६१,९५५.९६ हा त्याचा उच्चांक आणि ६१,४३६.९०चा नीचांक त्याने नोंदविला. बरोबरीने, राष्ट्रीय शेअर बाजाराचा निफ्टी निर्देशांक ७४.२५ अंशांनी (०.४१ टक्के) वाढून १८,४०३.४० वर दिवसअखेरीस स्थिरावला. सेन्सेक्समधील पॉवर ग्रिड, आयसीआयसीआय बँक, भारती एअरटेल, अल्ट्राटेक सिमेंट, स्टेट बँक, डॉ रेड्डीज आणि एशियन पेंट्स हे समभाग प्रामुख्याने वधारले. त्या उलट आयटीसी, रिलायन्स इंडस्ट्रीज, बजाज फिनसव्र्ह आणि नेस्ले हे समभाग गडगडले. सोमवारी अमेरिकेतील बाजारांचा प्रवास नकारात्मक राहिला. तथापि मंगळवारच्या व्यवहारात आशियातील सोल (कोरिया), टोक्यो (जपान), शांघाय (चीन) आणि हाँगकाँगमधील बाजार वाढ नोंदवून बंद झाले. अमेरिकी डॉलरच्या तुलनेत १७ पैशांनी मजबुती मिळविणाऱ्या रुपयाच्या मूल्यानेही गुंतवणूकदारांमध्ये खरेदीपूरक उत्साह निर्माण केला. सोमवारप्रमाणे मंगळवारच्या व्यवहारातही विदेशी संस्थागत गुंतवणूकदार बाजारात निव्वळ खरेदीदार राहिले. बाजाराकडे उपलब्ध तपशिलानुसार, सोमवारी त्यांनी १,०८९.४१ कोटी रुपयांचे समभाग खरेदी केले. उसळी कशामुळे? चलनवाढीच्या आघाडीवर उतार दर्शविणारी आकडेवारी पाहता, रिझव्र्ह बँकेकडून येत्या काळात व्याजदरात फार मोठी वाढ केली जाणार नाही, असा आशावाद बळावला आहे. परिणामी व्याजदराबाबत संवेदनशील असणाऱ्या बँका, वित्तीय आणि वाहन क्षेत्रातील समभागांना मागणी मिळविली आणि या उद्योग क्षेत्राचे निर्देशांक ०.५९ टक्के ते ०.७ टक्क्यांनी वाढले. निर्देशांकांना नवीन अनोखे स्तर गाठण्याची सबळता याच समभागांतील तेजीने मिळवून दिली. तेलात घसरण जगातील खनिज तेलाचा मोठा आयातदार असलेल्या चीनमध्ये करोनाच्या वाढत्या रुग्णसंख्येने तेथून तेलाच्या मागणीवर परिणाम होण्याची भीती आहे. याचा नकारात्मक परिणाम म्हणून तेलाच्या आंतरराष्ट्रीय किमतींचा मानदंड असलेल्या ब्रेंट क्रूडच्या किमती १.६२ टक्क्यांनी घसरून पिंपामागे ९१.६३ डॉलर पातळीवर मंगळवारी व्यवहार करीत होत्या. मंगळवारच्या सत्राच्या शेवटच्या अर्ध्या तासात तेजीवाल्यांनी दमदार पुनरागमनासह बाजाराचा ताबा घेतला. विशेषत: सरलेल्या तिमाहीत दमदार नफ्याची कामगिरी करणाऱ्या बँकांच्या समभागांसाठी येणारा काळही चांगलाच बहारदार राहणे अपेक्षित आहे. परिणामी बँक निफ्टी निर्देशांक मजल दरमजल नवीन उंची गाठत असून, तो ४३,००० ते ४४,०००ची अभूतपूर्व पातळीही दाखवू शकेल. जे एकंदर बाजारासाठी सकारात्मक ठरेल. - कुणाल शाह, वरिष्ठ तांत्रिक विश्लेषक, एलकेपी सिक्युरिटीज