ज्येष्ठ विधिज्ञ आणि भारताचे माजी महान्यायवादी सोली सोराबजी यांची निधनवार्ता शुक्रवारी, ३० एप्रिल रोजी आली तेव्हा अनेकांना आठवले असेल ते ‘दि इंडियन एक्स्प्रेस’च्या संपादकीय पानांवर त्यांनी अनेक वर्षे सातत्याने केलेले सडेतोड लिखाण! सोली सोराबजी हे साहजिकच अनेक पुस्तकांचेही लेखक होते आणि ही पुस्तके त्यांच्या नैमित्तिक लिखाणापेक्षा निराळी होती. उदाहरणार्थ, त्यांना ज्येष्ठ असलेले दिवंगत विधिज्ञ नानी पालखीवाला यांच्याविषयी त्यांनी लिहिलेले पुस्तक किंवा ‘गव्हर्नर : सेज ऑर सॅबोटिअर?’ हे १९८५ सालचे त्यांचे गाजलेले पुस्तक. पण सोली सोराबजी हेच एका पुस्तकाचा विषय ठरले होते! हे पुस्तक अगदी अलीकडे, नऊ मार्च रोजी त्यांच्या ९१व्या जन्मदिनी समारंभपूर्वक प्रकाशित झाले. ‘डाउन मेमरी लेन’ हे सोराबजी यांच्या या गौरवग्रंथाचे नाव. त्यात माजी सरन्यायाधीश दीपक मिश्रा, विद्यमान सरन्यायाधीश एन. व्ही. रमण, न्या. धनंजय चंद्रचूड, न्या. बी. एन. श्रीकृष्ण यांच्यापासून ते हरीष साळवे, अरविंद दातार आदी २५ हून अधिक ज्येष्ठ कायदेतज्ज्ञांचे लेख आहेत.
लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
First Published on May 1, 2021 12:00 am
