तोतया ‘रॉ’ अधिकारी अटकेत

औरंगाबाद : देशातील सर्वात मोठी गुप्तचर संस्था असलेल्या रॉ चा अधिकारी असल्याची थाप मारून अनेकांना कोटय़वधी रुपयांचा गंडा घालणाऱ्या भामटय़ाला आर्थिक गुन्हे शाखा पोलिसांनी अटक केली. अभिजित पानसरे (रा.नाशिक) असे तोतया ‘रॉ’च्या अधिकाऱ्याचे नाव असून त्याच्याकडून पोलिसांनी आयपीएस अधिकारी असल्याचे बनावट ओळखपत्र जप्त केले असल्याची माहिती आर्थिक गुन्हे शाखेच्या सूत्रांनी शुक्रवारी दिली.

अभिजित पानसरे हा आपण आयपीएस अधिकारी असून देशातील सर्वात मोठी गुप्तचर संस्था असलेल्या ‘रॉ’साठी काम करीत असल्याची थाप मारत होता. उच्चशिक्षित असलेला पानसरे हा हाय-फाय इंग्रजीत बोलून समोरच्या व्यक्तीवर छाप पाडत होता. औरंगाबादमधील रहिवासी शरद किसनराव गवळी यांची अभिजित पानसरे याच्यासोबत २०१६ मध्ये अ‍ॅड. नितीन भवर यांच्या मध्यस्थीने ओळख झाली होती. त्यावेळी पानसरे याने आपण ‘रॉ’चे अधिकारी असून नासाच्यावतीने आपल्याला न्यूक्लिअर रियाकटर तयार करण्याचे कंत्राट मिळाले आहे, असे सांगितले. त्यासाठी पानसरे याने गवळी यांना नासाची बनावट कागदपत्रे, बनावट धनादेश दाखवून ते खरी असल्याचे भासविले होते. त्यावेळी पानसरे याच्यासोबत दोन सहकारी महिलादेखील होत्या.

दरम्यान, अभिजित पानसरे याच्यावर विश्वास ठेवून शरद गवळी यांनी २० ऑक्टोबर २०१६ ते १२ ऑक्टोबर २०१७ या काळात दोन कोटी ५० लाख रुपयांची गुंतवणूक पानसरे याच्या प्रकल्पात केली होती. त्यानंतर पानसरे हा वेळोवेळी गवळी यांना पैसे परत देण्यास टाळाटाळ करीत होता. आपली फसवणूक झाली असल्याचे लक्षात आल्यावर शरद गवळी यांनी दिलेल्या तक्रारीवरून सिडको पोलीस ठाण्यात गुन्हा दाखल करण्यात आला आहे.