‘आम्ही उमेदवार ठरवतो , रात्रीतून तो निघून जातो’… ठाकरे गटाची दमछाक

छत्रपती संभाजीनगर जिल्ह्यातील नगरपालिका निवडणुकीमध्ये शिवसेना उद्धव ठाकरे पक्षाचा उमेदवार रात्री ठरवला जातो आणि सकाळी तो शिवसेनेच्या एकनाथ शिंदे पक्षात किंवा भाजपमध्ये जातो.

sambhajinagar municipal elections Uddhav sena candidates enter to shinde and bjp

‘आम्ही उमेदवार ठरवतो , रात्रीतून तो निघून जातो’… ठाकरे गटाची दमछाक (लोकसत्ता टिम)

छत्रपती संभाजीनगर : छत्रपती संभाजीनगर जिल्ह्यातील नगरपालिका निवडणुकीमध्ये शिवसेना उद्धव ठाकरे पक्षाचा उमेदवार रात्री ठरवला जातो आणि सकाळी तो शिवसेनेच्या एकनाथ शिंदे पक्षात किंवा भाजपमध्ये जातो. परिणामी रात्रीतून उमेदवार ठरवायचा आणि सकाळी तो सत्ताधााऱ्यांबरोबर दिसत असल्याने शिवसेना उद्धव ठाकरे गटाची दमछाक सुरु असल्याचे दिसून येत आहे. सिल्लोड, वैजापूर, कन्नड आणि गंगापूर या नगरपालिकेच्या निवडणुकीत उमेदवार शोधण्यासाठी ठाकरे गटाची धावपळ सुरू आहे.

वैजापूर नगरपालिकेच्या निवडणुकीत शिवसेनेच्या ठाकरे गटाने प्रकाश चव्हाण यांचे नाव जाहीर करण्यात आले. शिवसेना नेते चंद्रकांत खैरे, अंबादास दानवे यांनी नाव ठरविताना पुढाकार घेतला. सकाळी ते भाजपमध्ये गेले. या निवडणुकीच्या पार्श्वभूमीवर शिवसेनेचे माजी आमदार आर. एम. वाणी यांचे चिरंजीव सचिन वाणी यांनीही भाजपमध्ये प्रवेश घेणार आहेत. भाजप प्रदेशाध्यक्ष रवींद्र चव्हाण यांचा दौरा न झाल्याने तो प्रवेश थांबला होता. पण तो मंगळवारी म्हणजे १८ नोव्हेंबर रोजी होईल. आता वैजापूर नगरपालिकेमध्ये रात्री उमेदवार ठरवाचा आणि तो सत्ताधारी गटात जाताना दिसत आहे. ही प्रक्रिया जिल्हाभर सुरू आहे.

या नगरपालिकेवर डॉ. दिनेश परदेशी हे नेतृत्व करतात. ते सध्या भाजपमध्ये आहेत. या नगराध्यक्ष पद ओबीसी प्रवर्गासाठी राखीव असल्याने डॉ. परदेशी किंवा त्यांच्या कुटुंबियापैकी कोणीही निवडणूक रिंगणात उभे राहू शकतात. त्यांना विरोध करण्यासाठी आमदार प्रा. रमेश बोरनारे यांनी त्यांचे बंधू संजय बोरनारे यांना रिंगणात उतरवले आहे. त्यामुळे भाजप विरुद्ध एकनाथ शिंदे यांची शिवसेना यामध्ये लढत होईल.

हेही वाचा

हार नही मानुंगा… कवितेतून व्यक्त झाल्या पंकजा मुंडे

सिल्लोड मतदारसंघात उद्धव ठाकरे गटाला पाय पसरता आले नाहीत. या मतदारसंघात आमदार अब्दुल सत्तार यांचे चिरंजीव समीर निवडणूक लढवत आहेत. या नगरपालिकेमध्येही एकही उमदेवार सापडू शकला नाही. गंगापूरमध्ये एक मुस्लिम उमेदवार रिंगणात उभा असल्याचे सांगण्यात येत आहे.

कन्नड नगरपालिका निवडणुकीमध्ये ठाकरे गटाचे उमदेवार रात्रीतून सत्ताधारी पक्षात गेले. त्यामुळे उमेदवार शोधायचा. तो निवडणुकीत अर्ज दाखल करणार असे जाहीर करायचे आणि तो उमेदवार सकाळी सत्ताधारी गटात दिसून येत असल्याचे माजी खासदार चंद्रकांत खैरे यांनी मान्य केले. भाजप आणि शिंदे सेनेतील नेते उमेदवार पळवून नेत आहेत. त्यांना नक्की कोणते आमिष दाखवले जात आहे माहीत नाही. पण रात्रीतून उमेदवार ठरवला की सकाळी तो भाजपमध्ये किंवा शिवसेनेच्या शिंदे गटात दिसतो आहे. ही परिस्थिती असली तरी आम्ही लढू, असे खैरे म्हणाले.