३४९ सीसी इंजिन, आकर्षक लूक अन्… Royal Enfield ची नवीकोरी बुलेट पाहिलीत का? जाणून घ्या किंमतीसह सर्वकाही…

रॉयल एनफिल्डने लॉन्च केलेल्या या नव्या बुलेटमध्ये मोठे बदल करण्यात आले आहेत. या बुलेटचा लूक फारच आकर्षक आहे. या बुलेटमधील सर्वात मोठा बदल हा सीटमध्ये करण्यात आला आहे. याची सीट ही सिंगल पीस रुपात देण्यात आली आहे. त्याबरोबरच यात क्रोम फिनिश इंजिन, सोनेरी रंगाचा थ्री डी बॅज, मागील बाजूस डिस्क ब्रेक आणि ड्युअल चॅनल एबीएस सिस्टमही पाहायला मिळत आहे.

इंजिनची खासियत

रॉयल एनफील्डच्या बुलेट ३५० बाइकचे इंजिन जे सीरिजचे ३४९ सीसी एअर कूल्ड इंजिन आहे. हाच इंजिन सेटअप मीटीऑर ३५० आणि हंटरमध्येही देण्यात आला आहे. हे इंजिन 20.2 bhp पॉवर आणि 27Nm चा पीक टॉर्क जनरेट करू शकते. त्याबरोबरच स्पीड नियंत्रित करण्यासाठी बुलेटला 5-स्पीड गिअरबॉक्स देण्यात आला आहे.

पाच रंगात उपलब्ध

या नव्या कोऱ्या रॉयल एनफिल्ड बुलेटमध्ये पाच रंग उपलब्ध आहेत. यात मिलिट्री ब्लॅक, मिलिट्री रेड, स्टँटर्ड ब्लॅक, स्टँटर्ड मरुन आणि ब्लॅक गोल्ड हे पाच रंग आहेत. या नवीन बुलेटमध्ये हँड पेंटेड गोल्ड पिनस्ट्रीपही पाहायला मिळत आहे. त्याबरोबरच ग्राहकांना या बुलेटचे कस्टमायझेशनही करता येणार आहे.

नव्या बुलेटची किंमत किती?

या नवीन रॉयल एनफील्ड बुलेटच्या मिलिट्री व्हेरिएंटची सुरुवातीची किंमत १.७४ लाख रुपये आहे. त्याच्या मिड-लेव्हल व्हेरिएंटची (स्टँडर्ड) किंमत १.९७ लाख रुपये आहे. तर टॉप व्हेरिएंटची (ब्लॅक-गोल्ड) किंमत २.१६ लाख रुपये आहे. या सर्व किंमती एक्स-शोरूममधल्या आहेत.