भाजपची ‘मेड फॉर इच अदर’ची जाहिरात वादानंतर ‘ऑफ एअर’

राज्यातील महानगरपालिका निवडणुकांच्या पार्श्वभूमीवर सध्या भाजपकडून मतदारांना आकर्षित करण्यासाठी टेलिव्हिजनवर मोठ्याप्रमाणावर विकासकामांच्या जाहिराती दाखवल्या जात आहेत. मात्र, सोशल मीडियावरून करण्यात येणाऱ्या टीकेमुळे भाजपला यापैकी एक जाहिरात मागे घ्यावी लागली आहे. भाजपकडून विकासकामांच्या प्रसिद्धीसाठी ‘मेड फॉर इच अदर’ या कॅचलाईनखाली ही जाहिरात दाखविली जात होती. काही महाविद्यालयीन तरुणांमधील संवाद या जाहिरातीमध्ये दाखविण्यात आला आहे. भाजप पक्ष मुंबईसाठी का गरजेचा आहे, हे सांगताना हे तरुण भाजपच्या विकासकामांचा पाढा वाचताच. मात्र, या जाहिरातीचा एकुणच दर्जा सुमार आहे. त्यामुळे प्रदर्शित झाल्यानंतर सोशल मीडियावरून या जाहिरातीवर टीकेचा प्रचंड भडीमार होऊ लागला होता. त्यामुळे अखेर भाजपने ही जाहिरात मागे घेण्याचा निर्णय घेतला आहे. यावरून मुख्यमंत्री देवेंद्र फडणवीस यांनी भाजपच्या सोशल मीडिया विभागाला चांगलेच खडसावल्याचेही वृत्त आहे. तर दुसरीकडे भाजप नेते माधव भंडारी यांनी या सगळ्याचे खापर जाहिरात बनविणाऱ्या कंपनीवर फोडले आहे. जाहिरात कंपनीतील लोक वेगळ्या वातावरणात काम करतात. त्यामुळे त्यांना राजकीय आणि सामाजिक भावना समजत नाहीत. काहीवेळा जाहिरातींमधून चुकीचा संदेश जातो. त्यामुळे अशा जाहिराती लोकांना आवडल्या नाहीत तर त्या मागे घ्याव्या लागतात, असे भंडारी यांनी सांगितले.