लोकसत्ता व्यापार प्रतिनिधी
मुंबई: भारताच्या परकीय चलन गंगाजळीत वाढ झाली असून, ५ मे रोजी संपलेल्या आठवड्याच्या अवधीत गंगाजळी ७.१९ अब्ज डॉलरने वाढून ५७२ अब्ज डॉलरवर पोहोचली आहे, असे रिझर्व्ह बँकेने प्रसिद्ध केलेल्या आकडेवारीवरून पुढे आले. त्याआधीच्या आठवड्यात गंगाजळी ४.५३ अब्ज डॉलरने आटत ५८८.७८ अब्ज डॉलर नोंदण्यात आली होती.
ऑक्टोबर २०२१ मध्ये परकीय चलन गंगाजळीने ६४५ अब्ज डॉलर अशी उच्चांकी पातळी गाठल्यानंतर भांडवली बाजारात झालेली घसरण, रशिया-युक्रेन युद्ध, खनिज तेलाच्या दरातील मोठे चढ-उतार, परदेशी संस्थात्मक गुंतवणूकदारांच्या निधीचे निर्गमन हे परकीय गंगाजळी घसरणीतील प्रमुख घटक आहेत. विशेषत: रिझर्व्ह बँकेकडून गेल्या वर्षी अमेरिकी डॉलरच्या तुलनेत रुपयातील मूल्य घसरण रोखण्यासाठी डॉलरची मोठ्या प्रमाणावर विक्री करण्यात आल्याने परकीय चलन गंगाजळीत मोठी घसरण झाली होती. गेल्या वर्षी रुपया ८३ या ऐतिहासिक नीचांकी पातळीवर गडगडल्याने त्याला सावरण्यासाठी हस्तक्षेप करताना, रिझर्व्ह बँकेकडून गंगाजळीतील डॉलर खुले केले गेले.
आणखी वाचा-अदानी चौकशीसाठी सेबीला ३ महिन्यांची मुदत?
रुपयात घसरण
अमेरिकन डॉलरच्या तुलनेत रुपया शुक्रवारच्या सत्रात ७ पैशांनी घसरून ८२.१६ पातळीवर बंद झाला. इतर देशांच्या चलनांच्या तुलनेतदेखील डॉलर सावरल्याने रुपया कमकुवत झाला. मात्र देशांतर्गत भांडवली सकारात्मक कल आणि अखंडित परदेशी निधी प्रवाहामुळे या घसरणीला आळा बसला. परदेशी चलन विनिमय मंचावर रुपयाने ८२.११ पातळीवरून व्यवहाराला सुरुवात केली. दिवसभरातील सत्रात रुपयाने ८२.०९ ही उच्चांकी, तर ८२.२३ या नीचांकी पातळीला स्पर्श केले. गुरुवारच्या सत्रात रुपया ८२.०९ पातळीवर स्थिरावला होता.
