TCS Layoff: “मला १५ मिनिटांत राजीनामा देण्यास भाग पाडले”, TCS च्या फ्रेशरचा दावा; “आम्ही रडत होतो, तरीही एचआरने…”

टीसीएस ने त्यांच्या ८०% कर्मचाऱ्यांसाठी पगारवाढ जाहीर करण्याच्या एक दिवस आधी, एका रेडिट युजरने दावा केला की, त्यांना अनैतिकरित्या राजीनामा देण्यास भाग पाडण्यात आले आहे.

“टीसीएस फ्रेशर्सना काढून टाकत आहे का?” या शीर्षकाच्या पोस्टमध्ये, युजरने आरोप केला आहे की, अहमदाबाद आणि पुणे येथील अनेक फ्रेशर्सना केवळ चार ते पाच आठवडे बेंचवर ठेवून नोकरीवरून काढण्यात आले आहे.

या पोस्टनुसार, कंपनीच्या बेंच पॉलिसीमध्ये बदल करून क्लायंट प्रोजेक्टशिवाय राहण्याची मुदत केवळ ३५ दिवसांपर्यंत मर्यादित करण्यात आली आहे. त्यामुळे कर्मचाऱ्यांवर जबाबदारी टाकण्यात आली असून, कंपनीला ही नोकरकपात गुप्तपणे करता येत असल्याचा आरोपही करण्यात आला आहे.

मला राजीनामा देण्यास भाग पाडले

रेडिटरने आरोप केला आहे की, फ्रेशर्सही नोकरी कपातीच्या रडारवर आले आहेत. “काही दिवसांपूर्वी मला राजीनामा देण्यास भाग पाडण्यात आले,” असे या टीसीएस फ्रेशरने पोस्टमध्ये लिहिले आहे. त्याने दावा केला आहे की, एचआरने त्यांना बैठकीसाठी बोलावले, त्यांचा फोन बंद करण्यास सांगितले आणि नंतर त्यांना दोन पर्याय दिले; एक तात्काळ राजीनामा देण्याचा अथवा नकारात्मक रिलीज लेटर आणि पगारासह नोकरीतून काढून टाकण्यात येईल.

“मला राजीनामा दिल्यास तीन महिन्यांचा पगार मिळेल आणि रिलीज लेटरमध्ये कोणताही नकारात्मक शेरा नसेल”, अशी ऑफर दिल्याचे रेडिटरने पोस्टमध्ये पुढे म्हटले.

पोस्ट करणाऱ्या फ्रेशरने पुढे असा आरोप केला की, तो एका सक्रिय प्रोजेक्टवर असतानाही, एचआरने त्याच्याकडून ‘वैयक्तिक कारणांमुळे’ राजीनामा दिल्याचे नमूद करण्यासाठी दबाव टाकला.

आम्ही सर्वजण रडत होतो

या पोस्टनुसार, अशाच परिस्थितीत इतर चार फ्रेशर्सनाही राजीनामा द्यावा लागला आणि आम्ही सर्वजण रडत होतो. “एचआरने रडत असलेल्या फ्रेशर्सना खोलीबाहेर जाण्याचीही परवानगी दिली नाही”, असा दावाही या पोस्टमध्ये करण्यात आला आहे.

राजीनामा आणि नोकरीतून काढून टाकणे यापैकी एक पर्याय निवडण्यासाठी त्यांना फक्त १५ मिनिटे देण्यात आली, आणि त्यांच्या कुटुंबियांना फोन करण्याचीही परवानगी मिळाली नाही, असा आरोप फ्रेशरने पोस्टमध्ये केला आहे. “मी सुरक्षित पर्याय निवडला,” असे तो म्हणाला आणि शेवटी दबावाखाली राजीनामा दिल्याचे स्पष्ट केले.