केंद्र सरकारचा विज्ञान व तंत्रज्ञान विभाग आणि इंडियन इन्स्टिटय़ूट ऑफ सायन्स, बंगलोर यांच्या संयुक्त विद्यमाने विद्यार्थ्यांमध्ये विज्ञान व तंत्रज्ञान विषयातील संशोधनपर संकल्पनांना प्रोत्साहन देण्यासाठी देण्यात येणाऱ्या किशोर वैज्ञानिक प्रोत्साहन योजना- फेलोशिप २०१८ साठी खाली नमूद केल्याप्रमाणे पात्रताधारक विद्यार्थ्यांकडून प्रवेशिका मागविण्यात येतआहेत. * स्ट्रीम एसए - अर्जदार विद्यार्थ्यांनी २०१८-१९ या शैक्षणिक सत्रात विज्ञान विषयासह अकरावीत प्रवेश घेतलेला असावा व त्यांची दहावीच्या शालान्त परीक्षेतील गणित व विज्ञान विषयातील गुणांची टक्केवारी खुल्या गटातील विद्यार्थ्यांसाठी ७५% (राखीव गटातील विद्यार्थ्यांसाठी ६५% असायला हवी) * विशेष सूचना - योजनेअंतर्गत निवड झालेल्या विद्यार्थ्यांना त्यांनी २०२०-२१ या शैक्षणिक सत्रात विज्ञान विषयातील पदवी अभ्यासक्रमाच्या पहिल्या वर्षांत प्रवेश घेतल्यावर व त्यांनी विज्ञान विषयांसह बारावीची परीक्षा कमीत कमी ६०% गुणांसह (राखीव गटातील विद्यार्थ्यांसाठी ५०%) उत्तीर्ण झाल्यानंतरच फेलोशिपचे फायदे देय असतील. * स्ट्रीम एसएक्स- अर्जदार विद्यार्थ्यांनी २०१८-१९ या शैक्षणिक सत्रात विज्ञान विषयासह १२ वीत प्रवेश घेतलेला असावा. त्यांची दहावीच्या शालान्त परीक्षेत गणित व विज्ञान विषयातील गुणांची टक्केवारी ७५% (राखीव गटातील विद्यार्थ्यांसाठी ६५% असायला हवी व त्यांनी २०१९-२० या शैक्षणिक सत्रात विज्ञान पदवी अभ्यासक्रमात प्रवेश घेतलेला असावा. * स्ट्रीम एसबी- अर्जदार विद्यार्थ्यांनी २०१८-१९ या शैक्षणिक सत्रात विज्ञान विषयासह पदवी परीक्षेच्या पहिल्या वर्षांत प्रवेश घेतलेला असावा व विज्ञान विषयासह बारावीच्या परीक्षेतील गुणांची टक्केवारी ६०% (राखीव गटातील विद्यार्थ्यांसाठी ५०%) असायला हवी. * निवड पद्धती - अर्जदारांपैकी पात्रताधारक विद्यार्थ्यांची केव्हीपीवाय अ‍ॅप्टिटय़ूड टेस्ट घेण्यात येईल. संगणकीय पद्धतीने ही निवड चाचणी देशांतर्गत निर्धारित परीक्षा केंद्रांवर ४ नोव्हेंबर २०१८ रोजी घेण्यात येईल. संगणकीय निवड चाचणीत निर्धारित गुणांक मिळविणाऱ्या विद्यार्थी उमेदवारांची गुणवत्ता यादी तयार करण्यात येऊन त्यानुसार संबंधित गटांतर्गत किशोर वैज्ञानिक प्रोत्साहन योजनेमध्ये अंतिम निवड करण्यात येईल. * अधिक माहिती व तपशील - किशोर वैज्ञानिक प्रोत्साहन योजनेच्या संदर्भात अधिक माहिती व तपशिलासाठी प्रमुख वृत्तपत्रांत प्रकाशित झालेली केंद्र सरकारच्या विज्ञान व तंत्रज्ञान मंत्रालयाची जाहिरात पाहावी. अथवा या संकेतस्थळाला भेट द्यावी. * फेलोशिपची रक्कम व तपशील - योजनेअंतर्गत निवड झालेल्या विद्यार्थ्यांना त्यांच्या बीएससी- प्रथम वर्ष अभ्यासक्रमात प्रवेश घेतल्यावर दरमहा ५००० ते ६००० रु.ची शैक्षणिक फेलोशिप व वार्षिक आकस्मिक खर्चापोटी राशी देण्यात येईल. * अर्ज पाठविण्याचा पत्ता व शेवटची तारीख - संपूर्णपणे भरलेले व आवश्यक तो तपशील आणि कागदपत्रांसह असणारे प्रवेशिका अर्ज कन्व्हेनर, किशोर वैज्ञानिक प्रोत्साहन योजना, इंडियन इन्स्टिटय़ूट ऑफ सायन्स, बंगलोर- ५६००१२ या पत्त्यावर पाठविण्याची शेवटची तारीख ३१ ऑगस्ट २०१८ आहे.
