डॉ. श्रीराम गीत मी आता बीए तृतीय वर्षांत आहे. पुढील उच्च शिक्षण विद्यापीठात घेण्याची इच्छा आहे. पण सोबतच एमपीएससी २०२५ चा अभ्यास करत आहे. पुढील शिक्षणामुळे एमपीएससीकडे दुर्लक्ष होईल असे वाटते. मग असा विचार करत आहे की मुक्त विद्यापीठातून पुढील शिक्षण पूर्ण करावे. कृपया मार्गदर्शन करावे. - बाळाराम रामरूळे वर्गात बसून केलेल्या पदव्युत्तर अभ्यासक्रमाचा कोणत्याही स्पर्धा परीक्षेसाठी उपयोगच होतो. यूपीएससीसाठी ते आवश्यकच किंवा गरजेचं असतं असं समजायला हरकत नाही. एमपीएससीसाठी सुद्धा त्याचा उपयोगच होईल. तसेच प्लॅन बी म्हणून सुद्धा त्याचा फायदा होतो. जरूर विद्यापीठात येऊन अभ्यासक्रम पूर्ण करा. त्या दरम्यान पूर्व परीक्षा उत्तीर्ण होतो व नाही याचा तुम्हालाही अंदाज येईल. मी २०२३ मध्ये बीबीए पूर्ण केले. सर मी यूपीएस्सीचा अभ्यास करत आहे. २०२५ ला मी पहिला प्रयत्न देणार आहे. त्यामध्ये लवकर यश मिळवण्यासाठी मी कोणत्या गोष्टी करायला हव्यात? अभ्यासाची रणनीती काय असायला हवी? समाजशास्त्र हा विषय आहे. माध्यम मराठी निवडले आहे. तयारी कशी करू? - अजय घोंघावले. बीबीएच्या अभ्यासक्रमाचा स्पर्धा परीक्षांसाठी फारसा उपयोग होत नाही. समाजशास्त्र हा विषय बीबीएमध्ये अजिबातच नाही. समाजशास्त्राचा यूपीएससीसाठीचा अभ्यास एखादी नोकरी मिळवून ती करताना दोन वर्षे किमान यूपीएससीचा अभ्यास करणे गरजेचे राहील. बारावीपासून कला शाखा किंवा बीबीए सारखे विषय असले तर पूर्व परीक्षा व सी सॅटचा पेपर देणे सुद्धा खूप कठीण जाते. त्या दोघांवर प्रथम लक्ष केंद्रित करावे. एकीकडे सोशिऑलॉजी वाचणे चालू ठेवावे. एक छोटासा प्रश्न स्वत:लाच विचारा. आरक्षण विषयात गेल्या वर्षभरात घडलेल्या साऱ्या घडामोडीवर चारपाच पानाचा निबंध सलग दोन तासात लिहू शकता का? ही त्या विषयाची किमान तयारी समजायला हरकत नाही.