अभिनेत्री ऐश्वर्या राय-बच्चनचे वडील कृष्णराज राय यांचे शनिवारी प्रदीर्घ आजाराने लिलावती रुग्णालयात निधन झाले. गेल्या काही दिवसांपासून त्यांच्यावर लिलावती रुग्णालयात अतिदक्षता विभागात उपचार सुरु होते. 'इंडियन एक्स्प्रेस'ने प्रसिद्ध केलेल्या वृत्तानुसार, कृष्णराज राय यांचा कर्करोग बळावल्याने मृत्यू झाला असावा, असा अंदाज व्यक्त करण्यात येत आहे. त्यांना दोन आठवड्यापूर्वी रुग्णालयातून डिस्चार्ज देण्यात येणार होता. पण प्रकृती खालावल्याने त्यांना आयसीयूमध्ये दाखल करण्यात आले होते. अखेर आज त्यांची प्राणज्योत मालवली. कृष्णराज राय यांच्या पश्चात पत्नी, मुलगा, सून, मुलगी, जावई आणि नातवंडं असा परिवार आहे.
