पुलवामा जिल्ह्य़ात केंद्रीय राखीव पोलीस दलाच्या (सीआरपीएफ) ताफ्यावर गेल्या वर्षी फेब्रुवारी महिन्यात हल्ला करणाऱ्या दहशतवाद्यांना मदत केल्याप्रकरणी पुलवामातील एका नागरिकाला राष्ट्रीय तपास यंत्रणेने (एनआयए) अटक केली आहे, असे मंगळवारी अधिकाऱ्यांनी सांगितले. पुलवामा जिल्ह्य़ातील काकपोराचा रहिवासी असलेल्या बिलाल अहमद कुचे याला एनआयएने अटक केली असून तो लाकूड कापण्याच्या कारखान्याचा मालक आहे. बिलालला अटक करण्यात आल्याने या हल्ल्याप्रकरणी अटक करण्यात आलेल्यांची संख्या आता सात झाली आहे. बिलालची १० दिवसांच्या एनआयए कोठडीत रवानगी करण्यात आली.
