दिल्लीपाठोपाठ आज (रविवार) चेन्नई येथेसुद्धा इमारत कोसळल्याची दुर्घटना घडली. या दुर्घटनेत नऊ जण मृत्युमूखी पडले. मृतांमध्ये तीन महिलांचा समावेश असून, इमारतीच्या ढिगाऱ्याखालून अडकलेल्या लोकांना बाहेर काढण्याचे काम अजूनपर्यंत सुरू आहे. आतापर्यंत ढिगाऱ्याखालून १८ जणांना बाहेर काढण्यात आले आहे. या जखमींना नजीकच्या खासगी रूग्णालयात दाखल करण्यात आले आहे. मृतांपैकी पाच जणांची ओळख पटवण्यात यश आले असून, यापैकी चार जण आंध्रप्रदेशचे रहिवासी असल्याचे समजते. अद्यापपर्यंत इमारतीच्या ढिगाऱ्याखाली नक्की किती जण अडकले आहेत, याची निश्चित माहिती मिळालेली नाही. दुर्घटनाग्रस्त इमारतीचा ढिगारा हलविण्याचे काम युद्धपातळीवर सुरू असले तरी, त्यामध्ये अनेक अडथळे येत आहेत. दरम्यान, ढिगाऱ्याखालून उर्वरित लोकांना लवकरात लवकर बाहेर काढण्यासाठी प्रयत्न केले जात असल्याची माहिती राष्ट्रीय आपत्ती निवारण पथकाच्या एस.पी. सेल्व्हन यांनी दिली.
