काही दिवसांपूर्वी ज्येष्ठ सतारवादक पं. देबू चौधरी यांचे करोनामुळे निधन झाले. त्यांच्या पाठोपाठ आता त्यांचा मुलगा प्रतीक चौधरी यांचे देखील करोनामुळे निधन झाले आहे. काल दिल्लीमधील एका रुग्णालयात त्यांनी अखेरचा श्वास घेतला. त्यांच्या निधनानंतर संगीत क्षेत्रात हळहळ व्यक्त केली जात आहे.

अनेकांनी सोशल मीडिया पोस्टद्वारे त्यांना श्रद्धांजली वाहिली आहे. पवन झा यांनी दिलेल्या माहितीनुसार प्रतीक चौधरी यांनी वयाच्या ४९व्या वर्षी निधन झाले. त्यांनी गुरु तेग बहादुर रुग्णालयात अखेरचा श्वास घेतला.

‘ज्येष्ठ सतारवादक पंडीत देबू चौधरी यांचा मुलगा प्रतीक चौधरी यांचे निधन झाले आहे. गेल्या काही दिवसांपासून आयसीयूमध्ये प्रतीक यांच्यावर उपचार सुरु होते. काल प्रतीक यांनी अखेरचा श्वास घेतला’ या आशयाचे ट्वीट पवन झा यांनी केले आहे.

सीतू महाजन कोहली यांनी ‘प्रतीक यांना वडील देबू चौधरी यांच्या शेजारी रुग्णालयात बेड हवा होता. वडिलांच्या निधनानंतर एका आठवड्यामध्येच प्रतीक यांचे निधन झाले. आम्ही त्यांना वाचवू शकलो नाही’ असे म्हणत श्रद्धांजली वाहिली आहे.