08 March 2021

News Flash

भाजपात प्रवेशानंतर २४ तासात माजी फूटबॉलपटूची राजकारणाला ‘किक’

भाजपात प्रवेश केल्यानंतर दुसऱ्याच दिवशी माजी फूटबॉलपटूची राजकारणातून एक्झिट

भाजपात प्रवेश केल्यानंतर दुसऱ्याच दिवशी भारताचा माजी फूटबॉलपटू मेहताब हुसैन यांनी आपण कोणत्याही पक्षाशी संबंधित नसल्याचं म्हटलं आहे. कोलकातामध्ये ‘मिडफिल्ड जनरल’ म्हणून ओळखल्या जाणाऱ्या मेहताब हुसैन यांनी आपण राजकारण सोडत असून हा आपला वैयक्तिक निर्णय असल्याचं सांगितलं आहे. आपण भाजपात प्रवेश केल्यानंतर आपल्या कुटुंबीय आणि शुभचिंतकांनी व्यक्त केलेल्या भावना पाहून आपल्याला खूप धक्का बसल्याचं त्यांनी सांगितलं आहे.

मेहताब हुसेन यांनी बुधवारी प्रदेशाध्यक्ष दिलीप घोष यांच्या उपस्थितीत भाजपात प्रवेश केला होता. मेहताब हुसेन यांच्या हाती यावेळी भाजपाचा झेंडा देत ‘भारत माता की जय’ घोषणा देण्यात आल्या. पण प्रवेश केल्याच्या दुसऱ्याच दिवशी मेहताब हुसेन यांनी फेसबुकवर पोस्ट शेअर करत, “आपण सध्याच्या घडीला कोणत्याही पक्षाशी संबंधित नाही. मी घेतलेल्या निर्णयाबद्दल शुभचिंतकांची माफी मागतो,” असं म्हटलं आहे.

“हा निर्णय घेण्यासाठी आपल्यावर कोणीही जबरदस्ती केलेली नाही. राजकारणापासून दूर राहण्याचा हा आपला वैयक्तिक निर्णय आहे,” असं मोहताब हुसेन यांनी स्पष्ट केलं आहे. भारताकडून ३० फूटबॉल सामने खेळणाऱ्या आणि दोन गोल करणाऱ्या मेहताब हुसेन यांनी आपल्याला जास्त लोकांपर्यंत पोहोचायचं असल्याने राजकारणात प्रवेश करत असल्याचं सांगितलं होतं.

मेहताब हुसेन यांनी २०१८-१९ मध्ये फुटबॉल खेळणं सोडलं. आपण राजकारणात प्रवेश करण्याच्या निर्णयाने आपली बायको आणि मुलंही दुखावल्याचं त्यांनी सांगितलं आहे. “माझी पत्नी आणि मुलं कोणीही माझ्या या निर्णयाला पाठिंबा दिला नाही. माझ्या मित्र आणि समर्थकांप्रमाणे तेदेखील या निर्णयामुळे दुखावले होते. त्यांच्या दुखी चेहऱ्याकडे पाहून माझ्या मनाला खूप मोठा धक्का बसला,” असं मेहताब यांनी सांगितलं आहे.

भाजपाने मात्र टीएमसीकडून धमक्या मिळत असल्याने मेहताब हुसेन यांनी हा यु-टर्न घेतला असल्याचं म्हटलं आहे. “हा टीएमसीचं धमकावून घाबरवण्याचं राजकारण आहे. आम्ही याआधीही अशा गोष्टी पाहिल्या आहे. पण यामुळे टीएमसी आपला जनाधार गमावणा आहे,” असं भाजपाचे सरचिटणीस बासू यांनी सांगितलं आहे. टीएमसीने हे आरोप फेटाळले आहेत.

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on July 23, 2020 9:41 am

Web Title: ex indian footballer mehtab hossain quits politics within 24 hours of joining bjp sgy 87
Next Stories
1 आईने चार वर्षाच्या मुलीला अपहरणकर्त्यांपासून सोडवलं; थरार कॅमेरात कैद
2 धक्कादायक! करोनाबाधित रुग्णाच्या मृत्यूनंतर कुटुंबाने पेटवून दिली रुग्णवाहिका
3 थंडीचा सामना करण्यासाठी लष्कर सज्ज; चीनच्या कुरापती पाहून हिवाळ्याची योजना तयार
Just Now!
X