अमेरिकेत पुन्हा एकदा गोळीबार झाला आहे. शिकागो येथील मर्सी रुग्णालयात गोळीबाराची घटना घडली आहे. हल्लेखोराचा मृत्यू झाला असून या गोळीबारात एकूण तीन जण जखमी झाले आहेत. जखमींमध्ये एका पोलीस अधिकाऱ्याचा समावेश आहे. जखमींची प्रकृती चिंताजनक असल्याची माहिती आहे.

हल्लेखोराने स्वत:वर गोळी झाडून घेतली कि, सुरक्षा पथकांच्या कारवाईत तो मारला गेला हे अजून स्पष्ट झालेले नाही. रुग्णालयाच्या इमारतीच्या आत आणि बाहेर गोळया झाडल्याची प्राथमिक माहिती आहे. संशयित हल्लेखोर महिलेसह पार्किंग लॉटच्या दिशेने चालत असताना तो अचानक वळला व त्याने महिलेच्या छातीत गोळया झाडल्या.

त्यानंतर त्याने रुग्णालयाच्या इमारतीत प्रवेश करुन अंदाधुंद गोळीबार सुरु केला असे प्रत्यक्षदर्शीने सांगितले. अमेरिकन प्रसारमाध्यमांनुसार हा घरगुती हिंसाचाराचा प्रकार असून साखरपुडा मोडल्याच्या रागातून हे कृत्य केल्याचे सूत्रांनी सांगितले.