ईशान्य मुंबई मतदारसंघातून 'आम आदमी पक्षा'च्या तिकीटावर निवडणुक लढवण्याच्या तयारीत असलेल्या ज्येष्ठ सामाजिक कार्यकर्त्या मेधा पाटकर यांनी राजकारणात पदार्पण करणे कठीण असल्याची भावना व्यक्त केली. नर्मदा बचाओ आंदोलनाच्या नेत्या मेधा पाटकर आगामी लोकसभा निवडणुका 'आम आदमी पक्षा'च्यावतीने लढणार आहेत. मात्र, अनेक घटकांचा विचार करता माझ्यासाठी आगामी लोकसभा निवडणुकांचे आवाहन कठीण असल्याची कबुली मेधाताईंनी दिली. माझ्या गाठीशी अनेक आंदोलनांचा अनुभव असला तरी 'आप' पक्ष अजून प्राथमिक अवस्थेत असल्यामुळे आगामी लोकसभा निवडणुक आपल्यासाठी निश्चितच सोपी नसेल. वास्तवाचे भान नसणा-या आणि भ्रष्टाचारी राजकारण्यांमुळे आपल्यासारख्या नेत्यांना राजकारणात यावे लागते असे मेघा पाटकरांनी सांगितले.
