ओदिशाचे मुख्यमंत्री नवीन पटनायक यांनी मंगळवारी पंतप्रधान मोदी यांची भेट घेतली. या भेटीनंतर पटनायक यांनी सांगितले की, मी पंतप्रधना मोदींना लोकसभा निवडणुकीत दुस-यांदा यश मिळवल्याबद्दल त्यांचे अभिनंदन केले. तसेच, त्यांच्याकडे ओदिशाला विशेष राज्याचा दर्जा दिला जावा अशी मागणी देखील केली आहे. कारण, अशातच आम्ही एका भयंकर चक्रीवादळाचा तडाख सहन केला आहे. ज्याने आमच्या राज्याचे मोठ्याप्रमाणात नुकसान केले आहे. मुख्यमंत्री पटनायक हे राष्ट्रपती रामनाथ कोविंद यांची देखील भेट घेणार आहेत. याशिवाय त्यांचा १५ जून रोजी होणा-या नीती आयोगाच्या संचलान परिषदेच्या पाचव्या बैठकीत सहभागी होण्याचे देखील नियोजन आहे. दिल्लीत आपल्या दौ-या दरम्यान ते अनेक केंद्रीय मंत्र्यांच्या भेटी घेऊन केंद्र सरकारच्या आयुष्मान भारत, प्रधानमंत्री किसान योजना अशा योजनांवर चर्चा करण्याची शक्यता आहे.
