गुजरातमधील आश्रमात महिला साधकावर बलात्कार केल्याप्रकरणी स्वयंघोषित अध्यात्मिक गुरु आसाराम बापूचा मुलगा नारायण साई याला सुरतमधील न्यायालयाने शुक्रवारी दोषी ठरवले. नारायण साईच्या शिक्षेबाबत न्यायालय ३० एप्रिल रोजी निर्णय देणार आहे. सुरतमध्ये राहणाऱ्या दोन बहिणींनी नारायण साई आणि आसाराम बापू याच्यावर बलात्काराचा आरोप केला होता. सुरतमधील जिल्हा सत्र न्यायालयात या खटल्याची सुनावणी झाली. पीडित महिलांनी दिलेल्या जबाबाच्या आधारे पोलिसांनी तपासाला सुरुवात केली. हे प्रकरण सुमारे ११ वर्षे जुने होते. या प्रकरणात कोर्टात ५३ जणांनी साक्ष दिली. नारायण साई याच्याविरोधात बलात्काराचा गुन्हा दाखल होताच तो पसार झाला होता. तब्बल दोन महिन्यांनी पोलिसांनी नारायण साईला अटक केली होती. शुक्रवारी न्यायालयाने या प्रकरणात निकाल दिला. न्यायालयाने नारायण साईला दोषी ठरवले आहे.
