हरियाणा सरकारने गुरूग्राम येथे सात वर्षांच्या मुलीच्या मृत्यूनंतर पालकांना १६ लाखांचे बिल भरायला सांगणाऱ्या फोर्टिस रुग्णालयाचा भाडेपट्टी करार रद्द केला आहे. हरियाणाचे आरोग्यमंत्री अनिल विज यांनी हा करार तसेच रुग्णालाचे काही परवाने रद्द करण्याचे आदेशच दिले आहेत. डेंग्यूमुळे मुलीचा मृत्यू झाल्यानंतर धक्का बसलेल्या पालकांना १६ लाखांचे बिल देणाऱ्या रुग्णालयाविरोधात सर्वांनीच राग व्यक्त केला होता. प्रसारमाध्यमांबरोबरच समाजमाध्यमांवर या प्रकरणावर बरीच चर्चा झाली. अखेर हरियाणा सरकारे संबंधित रुग्णालयाचा भाडेपट्टी करार रद्द केला असून रुग्णालयातील रक्तेपेढीचा परवानाही रद्द करण्यात आला आहे. याशिवाय बेजबाबदार वागणुकीसाठी रुग्णालयाविरोधात गुन्हा नोंदवण्यात येणार आहे. पीडित कुटुंबीयाने या प्रकाराच्या चौकशीची मागणी केली होती. संबंधित प्रकरणाच्या चौकशीनंतर या मुलीच्या पालकांना रुग्णालयाने बीलाची रक्कम ७०० टक्क्यांनी वाढवून सांगिल्याची माहिती समोर आली आहे. या चौकशीनंतरच हरियाणाच्या आरोग्यमंत्र्यांनी हे आदेश दिल्याचे समजते. काय आहे प्रकरण आद्या सिंग नावाच्या ७ वर्षांच्या मुलीला दि. ३१ ऑगस्ट रोजी डेंग्यूमुळे फोर्टिस रूग्णालयात दाखल केले होते. १४ सप्टेंबर रोजी उपचारादरम्यान तिचा मृत्यू झाला. आद्या आपल्या आई-वडिलांबरोबर द्वारका येथे राहत होती. आद्याच्या कुटुंबीयांनी आरोप केला आहे की, त्यांच्या मुलीला तीन दिवस व्हेंटिलेटरवर ठेवण्यात आले होते. मात्र, तिच्या प्रकृतीत कोणतीही सुधारणा झाली नाही. रूग्णालयाने दोन आठवड्याचे १५.६ लाखांचे बिल आद्याच्या कुटुंबीयांना दिले. यामध्ये ६११ सिरिंज आणि १५४६ ग्लोव्हजच्या जोड्यांचाही समावेश आहे. वडिलांनी रुग्णालयावर केले होते आरोप मृत आद्याचे वडील जयंत सिंह यांनी दिलेल्या माहितीनुसार, रूग्णालयाने आद्याला गाऊन परिधान करण्यास भाग पाडले. त्याचे त्यांनी ९०० रूपये घेतले. ज्यावेळी त्यांनी आद्याला उपचारासाठी दुसऱ्या रूग्णालयात नेण्याचा निर्णय घेतला तेव्हा फोर्टिस रूग्णालयाने त्यांच्या हाती मृत्यू दाखलाच सोपवला. आद्याचा मेंदू ७० टक्के निकामी झाल्यानंतरही तिला व्हेंटिलेटरवर ठेवण्यात आले होते. एमआरआयमध्ये तिचा मेंदू ७० ते ८० टक्के इतका बाधित झाल्याचे दिसून आले. जर आम्ही रूग्णालय सोडले तर मृत्यू दाखला देणार नसल्याचे आम्हाला बजावण्यात आले. त्यावेळी एका डॉक्टरांनी माझ्या पत्नीशी संपर्क साधला आणि त्यांनी १५ ते २० लाखांत पूर्ण बॉडी प्लाझमा ट्रान्सप्लांटचा प्रस्ताव ठेवला. रूग्णालयाने स्पष्टीकरणात म्हटले होते. रूग्णालयाचे माध्यम प्रमुख अजेय महाराज यांनी फोर्टिस रूग्णालयाची बाजू मांडली होती. सर्व वैद्यकीय प्रोटोकॉल आणि वैद्यकीय मार्गदर्शिकेप्रमाणेच उपचार केल्याचा खुलासा त्यांनी हे प्रकरण समोर आल्यानंतर केला होता. सुमारे २० पानांचे विस्तृत बिल सिन्हा कुटुंबीयांना दिल्याचे त्यांनी सांगितले. उपचार करण्यात आले त्या १५ दिवसांत आद्यावर यांत्रिक व्हेंटिलेशन, हाय फ्रिक्वेन्सी व्हेंटिलेशन, इंट्रोप्स, प्रतिजैविके, वेदनाशामक आणि अॅन्लजेसियासारखे उपचार करण्यात आल्याचे त्यांनी म्हटले होते.
