आयपीएलच्या तेराव्या हंगामात अबु धाबीत रंगलेल्या मुंबई विरुद्ध बंगळुरु सामन्यात मुंबई इंडियन्सने सूर्यकुमार यादव आणि जसप्रीत बुमराह यांच्या कामगिरीच्या जोरावर ५ गडी राखून विजय मिळवला. या सामन्यावर सट्टा लावणाऱ्या तिघांना दिल्ली पोलिसांनी अटक केली आहे. दक्षिण दिल्ली परिसरातील कोटला मुबारकपूर भागात झालेल्या कारवाईत पोलिसांनी ३ आरोपींना अटक केली आहे. आम्हाला मिळालेल्या माहितीच्या आधारावर रात्री १० वाजून ३३ मिनीटांनी सैनी वस्ती भागातील एका घरावर छापेमारी करण्यात आली. यादरम्यान ३ आरोपी आपल्या फोनवरुन सट्टा स्विकारत होते. आशिष गुप्ता, योगेश आणि हिमांशु रावत अशी या तिन्ही आरोपींची नावं आहेत. या कारवाईत पोलिसांनी ५ मोबाईल फोन, ६० आणि २६ हजाराची एंट्री असलेले ३ कॅश रजिस्टर आणि इतर गोष्टी मिळून साडेतीन लाखांचा मुद्देमाल जप्त केला आहे. तिन्ही आरोपींविरोधात Delhi Public Gambling Act अंतर्गत गुन्हा नोंदवण्यात आला आहे.
