पाकिस्तानात तोडफोड झालेली वास्तू गुरू नानकांची नाही – इतिहास संशोधक

दरम्यान, डॉन या वृत्तपत्राने कोणत्याही तत्त्थ्यांची पडताळणी न करता अशा प्रकारचे वृत्त प्रकाशित केले असून हे बेजबाबदार वृत्त असल्याची प्रतिक्रिया लेखक आणि इतिहासकार अमरदीप सिंह यांनी दिली. अमरदीप सिंह हे पाकिस्तानातील शीखांच्या ऐतिहासिक वास्तूंचे अभ्यासक म्हणून परिचित आहेत. डॉनने दिलेल्या वृत्तात या वास्तूच्या मालकीहक्काबद्दल कोणतीही माहिती उपलब्ध नसल्याचे म्हटले आहे. “पाकिस्तानात शीख समुदायाच्या अनेक अशा ऐतिहासिक वास्तू आहेत, ज्यामध्ये शीख धर्मगुरूंची भित्तीचित्रे आहेत. अशा वास्तूंबद्दल माझ्या पुस्तकांमध्येही माहिती देण्यात आली आहे. या वास्तूंमध्ये गुरू नानक देव यांचे भित्तीचित्र लावण्यात आले म्हणून तो गुरू नानक देव यांचा महाल म्हणता येणार नाही,” असे अमरदीप सिंह यांनी स्पष्ट केले.

वाचा : पाकिस्तानातील ऐतिहासिक गुरूनानक महालाची तोडफोड

गुरू नानक यांनी कोणत्याही एका ठिकाणी कायम वास्तव्य केले नाही. त्यांनी आपल्या आयुष्यातील ३६ वर्षे केवळ प्रवास केला आणि साधे सोपे आयुष्य जगण्याचा संदेश दिला, असे अमरदीप सिंह यांनी सांगितले. “नानक महाल म्हणजे रणजित सिंह यांच्या काळात उभारण्यात आलेले शीख समुदायातील एका कुटुंबीयाचे घर आहे. ती वास्तू उभारण्यासाठी बांधण्यात आलेल्या विटांवरून ते स्पष्ट होत आहे. गुरू नानक यांच्या काळात घरे लोधी घराण्याची ओळख असलेल्या विटांनी तयार केली जात होती,” त्यांनी सांगितले. तसेच पाकिस्तानातील शीखांच्या इतिहासाबद्दल स्थानिकांमध्ये रूची वाढत असून त्यामुळेच अशा प्रकारचे लिखाण आणि गुरू नानक देव यांच्याशी संदर्भ जोडण्यात येत असल्याची शक्यता सिंह यांनी व्यक्त केली.