नवी दिल्ली : राज्ये व केंद्रशासित प्रदेशांजवळ लसीकरणासाठी अद्याप लशींच्या १.६३ कोटींहून अधिक मात्रा शिल्लक असल्याचे केंद्रीय आरोग्य मंत्रालयाने रविवारी सांगितले. मोफत आणि राज्यांमार्फत थेट खरेदी अशा दोन्ही श्रेणींच्या माध्यमांतून केंद्राने राज्ये व केंद्रशासित प्रदेशांना आतापर्यंत लशींच्या २४ कोटींहून अधिक (२४,६०,८०,९००) मात्रा दिल्या आहेत. यापैकी वाया गेलेल्या लशी जमेस धरता लशींच्या एकूण २२,९६,९५,१९९ मात्रांचा वापर झाला आहे. एकूण १,६३,८५,७०१ मात्रा अजूनही राज्ये व केंद्रशासित प्रदेशांकडे शिल्लक आहेत, अशी माहिती मंत्रालयाने दिली. रविवारी सकाळपर्यंत देशभरात ३२,४२,५०३ सत्रांमधून लोकांना लशींच्या एकूण २३,१३,२२,४१७ मात्रा देण्यात आल्या आहेत.
