News Flash

श्रीलंकेत महिंद्रा राजपक्षे सत्तेवरून पायउतार

श्रीलंकेतील अध्यक्षीय निवडणुकीत माजी राष्ट्राध्यक्ष महिंद्रा राजपक्षे यांनी शुक्रवारी स्वत:चा पराभव मान्य केला.

| January 9, 2015 11:08 am

श्रीलंकेतील अध्यक्षीय निवडणुकीत माजी राष्ट्राध्यक्ष महिंद्रा राजपक्षे यांनी शुक्रवारी स्वत:चा पराभव मान्य केला. आज सकाळापासून निवडणुकांचे निकाल हाती येण्यास सुरूवात झाल्यानंतर विरोधी पक्षाचे नेते मैथ्रीपाल सिरिसेना यांनी राजपक्षेंविरुद्ध आघाडी घेतल्याचे दिसून आले. त्यानंतर जनतेच्या या आदेशाचा आदर करत राजपक्षे यांनी राष्ट्राध्यक्षांचे निवासस्थान सोडल्याचे त्यांच्या प्रवक्‍त्याने सांगितले. या निवडणुकीचा अंतिम निकाल अद्याप जाहीर होणे बाकी असले तरी, सिरिसेना तब्बल ४,००,००० मतांनी विजयी होतील असा अंदाज वर्तविण्यात येत आहे.
तत्पूर्वी श्रीलंकेचे माजी पंतप्रधान व युनायटेड नॅशनल पक्षाचे नेते रानिल विक्रमसिंघे यांची भेट घेऊन राजपक्षे यांनी देशातील सत्तांतर कोणत्याही “अडचणीशिवाय‘ व्हावे, अशी इच्छा व्यक्त केली.
राजपक्षे यांच्याविरोधातील संयुक्त विरोधी पक्षाचे नेते मैथ्रीपाल सिरिसेना यांना निवडणुकपूर्व सर्वेक्षणामध्ये झुकते माप मिळाल्याचे स्पष्ट झाले होते. तमिळ नागरिकांची दाट लोकसंख्या असलेल्या उत्तर श्रीलंकेमधून सिरिसेना यांना मोठ्या प्रमाणावर मताधिक्‍य मिळाले. हा सत्तापालट श्रीलंकेच्या दशकभराच्या राजकीय इतिहासातील मोठी घटना मानली जात आहे. या निवडणुकीसाठी श्रीलंकेच्या जवळपास सर्वच भागांमध्ये ६५ ते ७० टक्के मतदान झाले होते.  जाफना जिल्ह्यात सिरिसेना यांना तब्बल २,५३,५७४ मते मिळाली; तर राजपक्षे यांना अवघ्या ७४,४५४ मतांवर समाधान मानवे लागले.
सिरिसेना यांनी देशाची राजधानी असलेल्या कोलंबोमध्येही आघाडी घेतली होती. देशामध्ये आपल्या व्यक्तिमत्त्वाचा प्रभाव निर्माण केलेल्या राजपक्षे यांना त्यांचे माजी सहकारी असलेल्या सिरिसेना यांच्याकडून अनपेक्षित आव्हान मिळाल्याचे मानले जात आहे. 

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

First Published on January 9, 2015 11:08 am

Web Title: sri lanka election mahinda rajapaksa concedes defeat to opposition candidate maithripala sirisena
टॅग : Mahinda Rajapaksa
Next Stories
1 जम्मू-काश्मीरमध्ये राज्यपाल लागवट लागू
2 लख्वीला अपहरणाच्या गुन्ह्यात जामीन
3 पॅरिसलगत दोन भावांचा शोध सुरू ..
Just Now!
X