कोलकाता पोलिसांच्या विशषे कृती दलाने (एसटीएफ) आज(रविवार) तीन संशयित दहशतवाद्यांना अटक करत, घातापाताचा मोठा कट उधळला. हे तिन्ही दहशतवादी जमात-उल-मुजाहिदीन बांग्लादेशचे सदस्य असण्याची शक्यता वर्तवण्यात आलेली आहे.

या तिघांनाही एसटीएफने आज दुपारी दक्षिण कोलकातामधील हरिदेवपूर भागातून अटक केली. पोलिसांनी सांगितले की, कोलकाता पोलिसांच्या विशषे कृती दलाने (एसटीएफ) या तिघांना पकडले. जेएमबी या संघटनेचे हे तिन्ही संशयित दहशतवादी काही महिन्यांपासून भाडेतत्वार खोली करून राहत होते. वरिष्ठ पोलीस अधिकाऱ्याने सांगितले की, गुप्तचर विभागाकडून माहिती मिळाल्यानंतर या तिघांना अटक करण्यात आली.

तर, ”आम्हाला जिहादी साहित्य सापडले आहे आणि त्यांच्या फेसबुक खात्यांची तपासणी केली गेली आहे. याशिवाय महत्त्वाच्या जेएमबी सदस्यांची नावे आणि फोन नंबर्स असलेली हस्तलिखित डायरी आढळली. चौकशी सुरू केली आहे. आम्ही हे उद्या कोर्टासमोर मांडू.” असे कोलकाता पोलीस एसटीएफचे अतिरिक्त आयुक्त व्ही. सोलोमन नेसाकुमार यांनी सांगितले आहे.