बस स्टॉपवर थांबलेल्या एका महिलेला लिफ्ट देण्याच्या बहाण्याने तिघांनी तिच्यावर कारमध्ये सामूहिक बलात्कार केला. उत्तर प्रदेशच्या शामली जिल्ह्यात ही धक्कादायक घटना घडली. हरयाणाला जाणारी बस पकडण्यासाठी पीडित महिला बस स्टॉपवर थांबली होती. पीडित महिलेच्या तक्रारीवरुन दोन आरोपींना अटक करण्यात आली असून एकजण अजूनही फरार आहे अशी माहिती स्टेशन हाऊस अधिकारी यशपाल धामा यांनी दिली. कैराना शहरात सामूहिक बलात्काराची ही घटना घडली. आरोपींनी पीडित महिलेला कारमध्ये लिफ्ट दिल्यानंतर तिला ते जाहानपुरा गावाजवळच्या जंगलात घेऊन गेले. तिथे त्यांनी तिच्यावर सामूहिक बलात्कार केला अशी माहिती यशपाल धामा यांनी दिली. घटनास्थळावरुन निघण्यापूर्वी आरोपींनी कोणाकडे वाच्यात केल्यास गंभीर परिणाम भोगावे लागतील अशी धमकी महिलेला दिली होती असे यशपाल धामा म्हणाले. पोलिसांकडून अटकेत असलेल्या दोन आरोपींची चौकशी सुरु असून तिसऱ्याचा शोध सुरु आहे.
