४५ भारतीयांच्या मृतदेहांना घेऊन विशेष विमान भारताच्या दिशेने रवाना, कोची विमानतळावर रुग्णवाहिकेसह पोलीस तैनात!| Building Fire in Kuwait : Kuwait Fire in Several Indians among 45 killed, Know Death Count and Injured Count

कुवेतही विमान रवाना (फोटो - @indembkwt/X)

Kuwait Fire : कुवेतच्या मंगफ भागातील एका इमारतीला लागलेल्या भीषण आगीत मृत्युमुखी पडलेल्या ४९ जणांचा मृत्यू झाला होता. यामध्ये ४५ जण भारतीय असल्याचे समजते. या ४५ जणांचं पार्थिव भारतात आणण्यासाठी कुवेतहून विमान रवाना झालं आहे. केंद्रीय मंत्री कीर्ती वधन सिंग यांनी यासंदर्भातील माहिती दिली. हे विमान केरळच्या कोची इथे उतरणार आहे.

आगीत जखमी झालेल्या भारतीयांच्या मदतीवर देखरेख करण्यासाठी आणि मृत्युमुखी पडलेल्यांचे पार्थिव लवकरात लवकर परत मिळावे यासाठी पंतप्रधान नरेंद्र मोदी यांच्या निर्देशानुसार परराष्ट्र राज्यमंत्री कीर्तिवर्धन सिंग कुवेतला पोहोचले होते. तेथे सिंग यांनी कुवेतचे परराष्ट्र मंत्री अब्दुल्ला अली अल-याह्या यांची भेट घेतली. कुवेतमधील भारतीय दूतावासाने सांगितले की अल-याह्या यांनी वैद्यकीय सेवा, मृतदेह त्वरित परत आणणे आणि घटनेच्या तपासासह संपूर्ण मदतीचे आश्वासन दिले आहे. दूतावासाने समाजमाध्यमांवर म्हटले आहे की, ‘परराष्ट्र मंत्री याह्या यांनी या दु:खद घटनेबद्दल शोक व्यक्त केला. राज्यमंत्र्यांनी सर्व संबंधित कुवेती अधिकाऱ्यांनी दिलेल्या सहकार्याचे कौतुक केले.’ सिंग यांनी मुबारक अल कबीर हॉस्पिटललाही भेट दिली. तिथे सात जखमी भारतीयांना दाखल केले आहेत. तत्पूर्वी, परराष्ट्र मंत्रालयाने बुधवारी रात्री एक निवेदन जारी केले होते. पंतप्रधान नरेंद्र मोदी यांनी ही घटना ‘दु:खद’ असल्याचे म्हटले.

हेही वाचा >> कुवेत आग दुर्घटना: मृत्युमुखी पडलेल्यांची डीएनए चाचणी, पार्थिव आणण्यासाठी हवाई दलाचे विमान सज्ज

हे विमान कुवेतहून कोचीसाठी निघाले आहे. विमान उतरणार असलेल्या कोची आंतरराष्ट्रीय विमानतळावर पोलीस आणि रुग्णवाहिकांची तुकडी तैनात करण्यात आली आहे. दक्षिणेकडील मंगफ शहरात १९६ स्थलांतरित कामगार राहत असलेल्या सात मजली इमारतीला बुधवारी लागलेल्या आगीत किमान ४९ परदेशी कामगारांचा मृत्यू झाला आणि ५० जण जखमी झाले. ही भीषण आग इलेक्ट्रिकल शॉर्ट सर्किटमुळे लागली असल्याची माहिती अग्निशमन दलाने दिली. तर, एका निवेदनात दलाने म्हटले आहे की काल ज्या इमारतीला आग लागली त्या घटनास्थळाची आणि इमारतीची क्षेत्रीय तपासणी केल्यानंतर हा निष्कर्ष काढण्यात आला आहे.

A special IAF aircraft carrying mortal remains of 45 Indian victims in the fire incident in Kuwait has taken off for Kochi.

MoS @KVSinghMPGonda, who coordinated with Kuwaiti authorities ensuring swift repatriation, is onboard the aircraft pic.twitter.com/PEmBfy4wj2
— India in Kuwait (@indembkwt) June 14, 2024

मृतांची ओळख पटली

मंगफ शहरात परदेशी कामगारांच्या निवासस्थानाच्या इमारतीला लागलेल्या भीषण आगीत मृत्युमुखी पडलेल्या ४५ भारतीय आणि तीन फिलिपिनो नागरिकांच्या मृतदेहांची ओळख पटवली आहे, असे एका उच्चपदस्थ अधिकाऱ्याने गुरुवारी सांगितले. गृहमंत्री आणि संरक्षण मंत्री म्हणून काम करणारे शेख फहाद अल-युसूफ अल-सबाह म्हणाले की, अधिकाऱ्यांनी ४८ मृतदेहांची ओळख पटवली आहे, त्यापैकी ४५ भारतीय आणि तीन फिलिपिनो नागरिकांचे आहेत. उर्वरित एका मृतदेहाची ओळख निश्चित करण्यासाठी प्रयत्न सुरू आहेत. दरम्यान, कुवेतच्या सरकारी वकिलाने या घटनेचा तपास सुरू केला आहे, असे सरकारी वकिलांनी सांगितले.

TOPICSमराठी बातम्या Marathi News

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Air force plane with bodies of 45 indians killed in kuwait fire on way to kerala sgk