शाळांना भरमसाठ फी आकारणीवर बंदी; आंध्र प्रदेश सरकारचा मोठा निर्णय

“हे ऐतिहासिक विधेयक आहे. राज्यातील शिक्षण व्यवस्था इतकी ढासळली आहे की, खासगी शाळा मनाला येईल तितकी फी आकारत आहेत. तरीही त्यांना कोणी प्रश्न विचारताना दिसत नाही. गेल्या सरकारमध्ये एक मंत्री होते ज्यांच्या अनेक शिक्षण संस्था होत्या. जेव्हा अशी व्यक्ती मंत्रीपदावर असते तेव्हा तुम्ही फीसारख्या गोष्टींवर कसं काय नियंत्रण आणू शकता ? राज्यातील सरकारी शाळांना जाणुनबुजून मागे पाडण्यात आलं आहे”, असं मुख्यमंत्री जगनमोहन रेड्डी यांनी सांगितलं आहे.

“शिक्षण हक्क कायद्यानुसार, प्रत्येक खासगी शाळेने कोणतंही शुल्क न घेता २५ टक्के जागा पुरवणं गरजेचं आहे. याची फी सरकार भरतं. पण गेल्या पाच वर्षात एकाही शाळेत शिक्षण हक्क कायद्याची अंमलबजावणी करण्यात आलेली नाही”, असंही मुख्यमंत्री जगनमोहन रेड्डी यांनी सांगितलं आहे.

मुख्यमंत्री जगनमोहन रेड्डी यांनी शाळेच्या सद्यस्थितीवरुन मागील सरकारवर जोरदार टीका केली. “सरकारी शाळांची अवस्था इतकी वाईट झाली आहे की, मध्यान्ह भोजनाचं बिल गेल्या आठ महिन्यांपासून भरण्यात आलेलं नाही. पुस्तकं आणि वह्यादेखील वेळेत पुरवण्यात आलेले नाहीत”, अशी माहिती मुख्यमंत्री जगनमोहन रेड्डी यांनी दिली.

पुढे बोलताना त्यांनी सांगितलं की, “जून महिन्यात पुस्तकांचं वाटप करणं अपेक्षित असताना ऑक्टोबरपर्यंतही ते पूर्ण झालं नव्हतं. अनेक सरकारी शाळा बंद पाडण्यात आल्या. यादरम्यान खासगी शाळांना मात्र खंडणी गोळा केल्याप्रमाणे फी वाढवण्यासाठी मोकळीक देण्यात आली”, असा आरोप जगनमोहन रेड्डी यांनी केला.

“आमचं सरकार शिक्षण नियामक व देखरेख आयोग गठीत करणार आहे. उच्च न्यायालयाच्या मुख्य न्यायाधीशांनी नेमणूक केलेले निवृत्त न्यायाधीश आयोगाचे प्रमुख असतील. आयोगात एकूण ११ सदस्य असतील. कोणत्याही शाळेतील प्रवेश प्रक्रिया आणि शिकवण्याच्या पद्धतीवर ते लक्ष ठेवू शकतात”, अशी माहिती जगनमोहन रेड्डी यांनी दिली.

“शाळांना मान्यता देणे तसंच शिक्षण हक्क कायद्याची अंमलबजावणी करण्याची जबाबदारी आयोगाकडे असणार आहे. तसंच शाळा प्रशासनाला चेतावणी देणे, दंड ठोठावणे इतकंच नाही तर शाळा बंद करण्याचा आदेश देण्याचा अधिकार आयोगाला असेल. शाळांनी आकारलेली फी विद्यार्थ्यांना झेपणारी आहे की नाही हेदेखील आयोग पाहणार आहे. यासोबत शैक्षणिक आणि पायाभूत सुविधांकडे त्यांचं लक्ष असेल”, अशी माहिती जगनमोहन रेड्डी यांनी दिली आहे.