पहिल्याच खटल्यात सूची यांना चार वर्षे तुरुंगवास

म्यानमारमध्ये लष्कराने १ फेब्रुवारीला सत्ता ताब्यात घेतल्यानंतर ७६ वर्षीय सू ची यांच्यावर खटले दाखल केले आहेत

म्यानमारच्या राजधानीतील विशेष न्यायालयाने पदच्युत नेत्या आंग सान सू ची यांना लोकांना भडकावल्याप्रकरणी तसेच करोना प्रतिबंधक नियमांचा भंग केल्याच्या प्रकरणात सोमवारी दोषी ठरवून चार वर्षांच्या कारावासाची शिक्षा सुनावली आहे, अशी माहिती विधि विभागातील अधिकाऱ्यांनी दिली.

म्यानमारमध्ये लष्कराने १ फेब्रुवारीला सत्ता ताब्यात घेतल्यानंतर ७६ वर्षीय सू ची यांच्यावर खटले दाखल केले आहेत. त्यापैकी हा एक खटला होता. सू ची यांच्यावरील अन्य काही खटल्यांचा निकाल पुढील आठवड्यात सुनावला जाण्याची शक्यता आहे. जर या सर्वच प्रकरणांत सू ची दोषी ठरविल्या गेल्या तर, त्यांना एकत्रितपणे शंभर वर्षांहून अधिक कारावासाची शिक्षा सुनावली जाऊ शकते.

 सू ची यांना तुरुंगवासाची शिक्षा सुनावण्यात आल्याचे वृत्त समजताच निषेधाचा सूर उमटू लागला आहे. संयुक्त राष्ट्रांचे मानवी हक्कविषयक माजी विशेष दूत यांगही ली यांनी न्यायालयातील हा खटलाच बनावट असल्याची टीका केली. सध्या  न्यायालयेसुद्धा लष्कराच्या अंकित असल्याने निर्णय नि:पक्षपातीपणे होणार नाहीत, असे ते म्हणाले.

अन्य मानवी हक्क कार्यकर्त्यांनी याबाबत अ‍ॅम्नेस्टी इंटरनॅशनलकडे तक्रार केली आहे.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व देश-विदेश बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Ang sang suki sentenced to four years in prison in the first case abn

ताज्या बातम्या