अयोध्येत ‘राम दरबार’ची प्राणप्रतिष्ठा

या वेळी राम दरबार आणि आठ विग्रहांची प्राणप्रतिष्ठा यानिमित्त मुख्यमंत्री योगी आदित्यनाथ दर्शन, पूजन कार्यक्रमात सहभागी झाले होते. हा सोहळा ‘गंगा दशहरा’ या तिथीला करण्यात आला. हिंदू पंचांगानुसार हा दिवस अत्यंत शुभ मानला जातो. हिंदू धर्मग्रंथांनुसार, याच दिवशी राजा भगीरथ यांच्या तपश्चर्येने प्रेरित होऊन पवित्र गंगा नदी महादेवांच्या जटेतून पृथ्वीवर अवतरली होती. या वेळी मुख्य राम दरबारव्यतिरिक्त, राम मंदिर संकुलातील अन्य आठ मंदिर परिसरातदेखील अभिषेक करण्यात आला.

श्रीराम जन्मभूमी तीर्थक्षेत्र ट्रस्टने दिलेल्या माहितीनुसार, सकाळी ६.३० वाजता यज्ञ मंडपात पूजा करून मूर्तीचा अभिषेक करण्यात आला. त्यानंतर सकाळी ९ वाजता यज्ञ झाल्यानंतर सर्व मंदिरांमध्ये एकाच वेळी विधी सुरू झाले. ज्या देवतांना अभिषेक करण्यात आला त्यात श्री राम दरबार (मध्यवर्ती प्रतिष्ठापना), शेषावतार, ईशान्य कोपऱ्यात (ईशान) भगवान शिव, आग्नेय कोपऱ्यात (अग्नि) भगवान गणेश, दक्षिणेकडील कोपऱ्यात भगवान हनुमान, नैऋत्य कोपऱ्यात सूर्यदेव,उत्तर-पश्चिमेकडे (वायव्य) देवी भगवती आणि उत्तरेकडील कोपऱ्यात देवी अन्नपूर्णा यांचा समावेश आहे. सोहळ्यात देशातील विविध भागांतून आलेल्या धार्मिक विद्वानांच्या उपस्थितीत वैदिक परंपरेनुसार हा सोहळा साजरा करण्यात आल्याची माहिती ट्रस्टचे विश्वस्त अनिल मिश्रा यांनी दिली.

भाविकांची अलोट गर्दी

सोहळ्यावेळी मंदिर परिसरात भाविकांची गर्दी झाली होती. कार्यक्रमादरम्यान अयोध्येभोवती त्रिस्तरीय सुरक्षा व्यवस्था करण्यात आली होती. कायदा आणि सुव्यवस्था सुनिश्चित करण्यासाठी ड्रोनविरोधी तंत्रज्ञान, सीसीटीव्ही कॅमेरे आणि पाळत ठेवणाऱ्या प्रगत यंत्रणांसह विशेष प्रशिक्षित सुरक्षा कर्मचारी तैनात करण्यात आले होते.