मशीदीवरील हल्ल्यानंतर श्रीलंकेत सोशल मीडियावर बंदी

फेसबुकवर एका व्यक्तीने आक्षेपार्ह पोस्ट टाकली होती. त्यानंतर चिलाऊ भागातील मुस्लीम आणि ख्रिस्ती समाजामध्ये दंगे उसळले होते. स्थानिकांच्या मते चिलाऊ भागात ख्रिस्ती समाजातील बांधवांची संख्या अधिक आहे. संबंधित व्यक्तीने टाकलेली पोस्ट ही धमकीची असल्याची धारणा येथील लोकांमध्ये झाल्यामुळे हे दंगे उसळल्याचे स्थानिकांकडून सांगण्यात आले. या फेसबुक पोस्टनंतर जमावाने तीन मशीदी आणि मुस्लीम नागरिकांच्या दुकानावर दगडफेक केली. या घटनेनंतर संबंधित परिसरात रविवारी कर्फ्यू लावण्यात आला. तसेच सोशल मीडियावरही बंदी घालण्यात आली. बिझनेस स्टँडर्डने याबाबत वृत्त दिले आहे.

दरम्यान, फेसबुकवर आक्षेपार्ह पोस्ट टाकणाऱ्या व्यक्तीला अटक करण्यात आल्याची माहिती श्रीलंका पोलिसांचे प्रवक्ते रूवान गुणशेखर यांनी दिली. याव्यतिरिक्त सोशल मीडियाचा वापर करून जहाल विचार मांडणाऱ्या एका मौलवीलाही अटक करण्यात आली आहे. दरम्यान, कर्फ्यू लावण्यात आलेल्या कालावधीत कोणत्याही प्रकारची अनुचित घटना घडली नसल्याने परिस्थिती नियंत्रणात आली आहे. त्यामुळेच चिलाऊ आणि अन्य ठिकाणी लावण्यात आलेला कर्फ्यू सोमवारी पहाटे हटवण्यात आल्याचे गुणशेखर म्हणाले. यापूर्वी 6 मे रोजीही श्रीलंकेत सोशल मीडियावर बंदी घालण्यात आली होती.