Bihar Election Results 2025 : ना भाजपा, ना जदयू; बिहारमध्ये ‘या’ पक्षाला मिळाली सर्वाधिक मतं

दुसऱ्या बाजूला, महाआघाडीमधील पक्षांना ४० जागा देखील जिंकता आलेल्या नाहीत. राष्ट्रीय जनता दलाचे उमेदवार २५ जागांवर विजयी झाले आहेत. काँग्रेसला एकेरी जागांवर समाधान मानावं लागलं आहे. कारण काँग्रेसचे केवळ सहा उमेदवार निवडून आले आहेत.

राजद सर्वात मोठा पक्ष

बिहारमध्ये भाजपा व जदयू हे सर्वात मोठे पक्ष ठरले असले तरी मतांच्या बाबतीत हे पक्ष सर्वात पुढे नाहीत. बिहारमध्ये लालू प्रसाद यादव यांच्या राष्ट्रीय जनता दलाला सर्वाधिक मतं मिळाली आहेत. मात्र, सर्वाधिक मतं मिळूनही या पक्षाला केवळ २५ जागा जिंकता आल्या आहेत. त्यामुळे तेजस्वी यादव यांचं मुख्यमंत्री होण्याचं स्वप्न भंगलं आहे.

लोजपाची मुसंडी

या निवडणुकीतील खास बाब म्हणजे राजदला सर्वाधिक २३ टक्के मतं मिळाली असून केवळ २५ जागा जिंकता आल्या आहेत. तर, चिराग पासवान यांच्या लोकजनशक्ती पार्टीने (रामविलास) केवळ ४.९७ टक्के मतं मिळवली आहेत. या पाच टक्के मतांच्या जोरावर लोजपाने १९ जागा जिंकल्या आहेत.

एनडीएच्या जमेच्या बाजू

ऐन मतदानाच्या तोंडावर बिहारमधील १.२ कोटी महिलांना देण्यात आलेली प्रत्येकी १० हजार रुपयांची रोजगाराभिमुख मदत, मुख्यमंत्री नितीश कुमार यांच्या मागे भारतीय जनता पार्टी व राष्ट्रीय स्वयंसेवक संघाने उभी केलेली संघटित ताकद, विस्कळीत विरोधी आघाडी, राष्ट्रीय जनता दलाचे मुस्लीम-यादव मतपेढीचे फसलेले गणित या घटकांमुळे बिहार विधानसभा निवडणुकीत भाजप-संयुक्त जनता दलप्रणीत राष्ट्रीय लोकशाही आघाडीने (एनडीए) अभूतपूर्व विजय मिळवला.