नैराश्यग्रस्त जवानाचा मुख्यमंत्री निवासासमोर गोळीबार

नैराश्याने ग्रस्त असलेल्या एका सीमा सुरक्षा दलाच्या जवानाने मुख्यमंत्री ओमर अब्दुल्ला यांच्या निवासस्थानाबाहेर गोळीबार केला. सुरक्षेतील ही कमतरता मानली जात आहे. त्याने सकाळी गोळीबाराच्या १२ फैरी झाडल्या व त्यामुळे उच्च सुरक्षेच्या या भागात घबराट निर्माण झाली. या गोळीबारात कोणीही जखमी झाले नाही.
गोळीबार करणाऱ्या कॉन्स्टेबलचे नाव केश्टो घोष असे असून तो मुख्यमंत्र्यांच्या गुपकर रोड येथील निवासस्थानी बंदोबस्तास होता. अब्दुल्ला हे विधानसभा निवडणुकीच्या प्रचारासाठी बाहेर गेलेले आहेत. घोष हा पश्चिम बंगालचा असून त्याला ताबडतोब ताब्यात घेण्यात आले आहे. त्याने पोलिसांना सांगितले की, आपल्याला खूप नैराश्य असून त्यामुळे आपण हे कृत्य केले.
ओमर हे लडाखमधील नुब्रा येथे असून त्यांनी ट्विट केले आहे की, आपल्या निवासस्थानी असलेल्या सीमा सुरक्षा दलाच्या जवानांवर आपला विश्वास आहे. सीमा सुरक्षा दलाच्या प्रवक्तयाने सांगितले की, घोष हा २०१२ मध्ये भरती झाला होता. तो शारीरिकदृष्टय़ा तंदुरूस्त होता पण आज सकाळी तो विचित्र वागला. त्याच्याविषयी कुठलीही प्रशासकीय तक्रार नाही. त्याला नियमाप्रमाणे रजा दिली होती त्यामुळे तोही मुद्दा नाही. चौकशी पूर्ण होईपर्यंत त्याला मुख्यमंत्र्यांच्या निवासस्थानी काम दिले जाणार नाही. त्याला काहीही झाले नसल्याचे डॉक्टरांनी सागितले. या भागात सरकारी अधिकारी, मंत्री व गुप्तचर अधिकाऱ्यांची निवासस्थाने असल्याने गोळीबाराने घबराट निर्माण झाली होती. याबाबत अधिक चौकशी सुरू आहे.