पीटीआय, श्रीनगर
जम्मू-काश्मीर विधानसभेचे कामकाज विशेष दर्जाच्या मुद्द्यावरून गुरुवारी सलग दुसऱ्या दिवशी तहकूब करावे लागले. राज्याला विशेष दर्जा पुन्हा मिळावा, असा ठराव विधानसभेत आवाजी मतदानाने बुधवारी मंजूर झाला. या ठरावाला विरोधकांनी विरोध केला. यादरम्यान भाजपचे आमदार आणि सभागृहात बंदोबस्तासाठी असलेले मार्शल यांच्यात धक्काबुक्की झाली.
विधानसभेचे कामकाज गुरुवारी सकाळी सुरू झाल्यानंतर भाजपच्या ठरावाविरोधातील गदारोळाने सभागृह दणाणून गेले. जम्मू-काश्मीरला पुन्हा विशेष दर्जा मिळवून देण्याचा ठराव बेकायदा असल्याचे भाजपने म्हटले असून, हा ठराव हटविण्यात यावा, अशी मागणी केली आहे. विधानसभा अध्यक्षांनी मंजूर केलेला ठराव रद्द करण्याचे अधिकार आपल्याला नसल्याचे सांगून, सभागृहानेच हा ठराव रद्द केला, तर तो होईल अशी भूमिका घेतली. या गदारोळात पीडीपी आणि ‘पीपल्स कॉन्फरन्स’च्या आमदारांनी नव्या ठरावाची प्रत सादर केली.
हेही वाचा >>>मुंबईतील १६ वर्षीय मुलीवर रिक्षाचालक आणि सहा मुलांचा सामूहिक बला
यात अनुच्छेद ३७० आणि ३५ अ तत्काळ पूर्ववत करण्याची मागणी करण्यात आली. विरोधी पक्षनेते सुनील शर्मा ठरावावर बोलत असताना अवामी इत्तेहाद पक्षाचे नेते शेख खुर्शीद हौद्यात उतरले. अनुच्छेद ३७० आणि ३५ अ पूर्ववत करण्याचा फलक त्यांनी हातात घेतला होता. भाजपचे आमदार आणि खुर्शीद यांच्यात या वेळी धक्काबुक्की झाली. भाजप आमदारांनी खुर्शीद यांच्या हातातील फलक घेऊन तो फाडून टाकला. विशेष दर्जावरून नॅशनल कॉन्फरन्सचे चाललेले नाटक आम्हाला संपवायचे आहे, असे वक्तव्य शर्मा यांनी केल्यानंतर वातावरण अधिकच चिघळले. दोन्ही बाजूंनी घोषणाबाजी करण्यात आली.
