अमेरिकेत ९० देशांवर आयात शुल्क लागू, ‘या’ देशांवर भारतापेक्षा अधिक टॅरिफ

US Tariffs on Countries List : अमेरिकेचे अध्यक्ष डोनाल्ड ट्रम्प यांनी जाहीर केलेल्या आयात शुल्काची (टॅरिफ) आजपासून (७ ऑगस्ट) अंमलबजावणी सुरू झाली आहे. अमेरिकेने ९० हून अधिक देशांवर टॅरिफ लागू केलं आहे. दरम्यान, मध्यरात्री ट्रम्प यांनी समाजमाध्यमांवर एक पोस्ट केली. या पोस्टमध्ये त्यांनी म्हटलं आहे की “मध्यरात्र झाली आहे. आता अब्जावधी डॉलर्स अमेरिकेत येत आहेत.” दरम्यान, भारतावर लागू करण्यात आलेला २५ टक्के इतका आयात कर देखील लागू करण्यात आला आहे. तसेच ट्रम्प यांनी भारताला आणखी २५ टक्के आयात शुल्क लादण्याची धमकी दिली आहे. २७ ऑगस्टपासून हे आयात शुल्क लागू केलं जाईल, असंही त्यांनी म्हटलं आहे.