‘त्या’ महिलेच्या आत्महत्येप्रकरणी राहुल गांधीवर गुन्हा दाखल

जोरहाट येथील महिलेला आत्महत्येस प्रवृत्त केल्याप्रकरणी काँग्रेसचे उपाध्यक्ष राहुल गांधी यांच्याविरुद्ध एफआयआर दाखल करण्यात आली आहे. एका कार्यक्रमात महिलेने काँग्रेस उपाध्यक्ष राहुल गांधी यांचे चुंबन घेतले होते. यानंतर या महिलेने आत्महत्या केला होती. या महिलेला आत्महत्येस प्रवृत्त केल्याप्रकरणी तसेच महिलेच्या प्रतिष्ठेला धक्का पोहोचवल्याच्या तक्रारीवरून पोलिसांनी राहुल गांधी यांच्याविरोधात गुन्हा दाखल केला आहे. नारी मुक्ती संग्राम समिती नावाच्या संघटनेने केलेल्या तक्रारीवरून राहुल यांच्याविरोधात गुन्हा नोंदवण्यात आला आहे.
२६ फेब्रुवारी रोजी राहुल यांच्या जोरहाट येथील कार्यक्रमाला ही महिला हजर होती. यावेळी राहुल यांच्या गालावर या महिलेने चुंबन घेतले होते. हा प्रकार पाहिल्यानंतर तिचे आणि नवऱ्याचे भांडण झाले. त्यातूनच या महिलेने स्वत:ला जाळून घेतले. या भयंकर घटनेत सदर महिलेचा मृत्यू झाला होता, असे नारी मुक्ती संग्राम समितीने आपल्या तक्रारीत नमूद केले आहे. या संपूर्ण प्रकाराला व महिलेचा मृत्यू होण्यास राहुल हे जबाबदार असल्याचा आरोप या संघटनेने केला आहे.