रेमंड समूहाचे संस्थापक डॉ. विजयपत सिंघानिया यांना गुरुवारी रुग्णालयात दाखल करण्यात आले. छातीत दुखू लागल्याने त्यांना ब्रीच कँडी रुग्णालयात भरती करण्यात आले असून मार्च महिन्यातच सिंघानिया यांची बायपास सर्जरी झाली होती.
गुरुवारी संध्याकाळी साऊथ मुंबई क्लब येथे डॉ. विजयपत सिंघानिया यांना छातीत दुखू लागले. यानंतर त्यांना तातडीने रुग्णालयात दाखल करण्यात आले. डॉ. हेमंत ठाकर यांनी त्यांची तपासणी केली आणि रुग्णालयात भरती होण्याचा सल्ला दिला. ‘पुढील ४८ तास सिंघानिया यांना देखरेखीखाली ठेवले जाईल. सिंघानिया यांना उच्च रक्तदाब असून त्यांची प्रकृती सध्या स्थिर आहे’ असे रुग्णालय प्रशासनाने सांगितले.
देशातील सर्वात श्रीमंत कुटुंबापैकी एक असलेल्या सिंघानिया कुटुंब संपत्तीच्या वादामुळे चर्चेत आला आहे. रेमंड या ख्यातनाम ब्रँडचे संस्थापक विजयपत सिंघानिया आणि त्यांचा मुलगा गौतम सिंघानिया यांच्यात वाद निर्माण झाला आहे. विजयपत सिंघानिया यांनी मुलगा गौतम यांच्याकडे कंपनीची जबाबदारी सोपवली होती. सध्या विजयपत सिंघानिया मुंबईतील ग्रँड पराडी सोसायटीत राहतात. मलबार हिलमधील घराचा ताबा मिळवण्यासाठी विजयपत सिंघानियांनी मुंबई हायकोर्टाचे दार ठोठावले आहेत. ‘मुलगा विजयपत सिंघानिया यांची काळजी घेत नाही, विजयपत यांची कार आणि चालकदेखील काढून घेतले’ अशी व्यथा विजयपत सिंघानिया यांनी वकिलांच्यावतीने मुंबई हायकोर्टात मांडली होती.
