Donald Trump : अमेरिकेचे राष्ट्राध्यक्ष डोनाल्ड ट्रम्प यांनी आतापर्यंत अनेक मोठे निर्णय घेतले आहेत. त्यांच्या निर्णयांमध्ये टॅरिफची जगभरात मोठी चर्चा होत आहे. ट्रम्प यांनी आतापर्यंत दक्षिण अफ्रिका, चीन, जपान, दक्षिण कोरिया, भारतासह आदी देशांवर मोठ्या प्रमाणात टॅरिफ लादलेलं आहे. ट्रम्प यांनी भारतावर जवळपास ५० टक्के ‘टॅरिफ’ लादलेलं आहे. त्यामुळे भारताला मोठ्या प्रमाणात फटका बसत असल्याचं पाहायला मिळत आहे.
एवढंच नाही तर भारत रशियाकडून तेल आयात करत असल्याच्या मुद्यांवरूनही ट्रम्प यांनी अनेकदा टीका केली. तसेच भारताने रशियाकडून तेल खरेदी करणं बंद करण्याचं आवाहन ट्रम्प यांनी केलं. मात्र, भारताने त्यावर कोणताही ठोस असा निर्णय घेण्यास नकार दिला. गेल्या काही दिवसांपासून अमेरिका आणि भारतामध्ये व्यापार करार होणार असल्याचं बोललं जात आहे. मात्र, अद्याप हा करार झालेला नाही.
या सर्व घडामोडीनंतर आता अमेरिकेचे राष्ट्राध्यक्ष डोनाल्ड ट्रम्प यांनी एक मोठं भाष्य केलं आहे. भारताबरोबरच्या व्यापार कराराच्या चर्चांबाबत बोलताना दोन्ही देशातील कराराच्या चर्चेत लक्षणीय प्रगती झाली असून दोन्ही देश कराराच्या जवळ असल्याचं सूचक वक्तव्य डोनाल्ड ट्रम्प यांनी केलं आहे.
ट्रम्प यांनी म्हटलं की, “आम्ही भारताबरोबर एक करार करत आहोत, जो पूर्वी केलेल्या करारांपेक्षा खूप वेगळा असेल. कराराच्या अगदी जवळ पोहोचलो आहोत. आपण एक निष्पक्ष व्यापार करार करणार आहोत. सध्या त्यांना (भारताला) माझ्यावर प्रेम नाही पण ते पुन्हा आमच्यावर प्रेम करतील आणि एक करार यशस्वी होईल, कारण ते खूप चांगले वाटाघाटी करणारे आहेत. पण ते (राजदूत सर्जियो गोर) तुम्हाला पहावं लागेल”, असं डोनाल्ड ट्रम्प यांनी म्हटलं.
दरम्यान, डोनाल्ड ट्रम्प यांनी भारतातील नवीन अमेरिकेचे राजदूत सर्जियो गोर यांना शपथ दिल्यानंतर सांगितलं की ते भारतासोबतची अमेरिकेची धोरणात्मक भागीदारी मजबूत करतील. भारत ही जगातील सर्वात जुनी संस्कृती आणि एक महान देश आहे. पंतप्रधान नरेंद्र मोदींशीही त्यांची मैत्री आहे आणि राजदूत सर्जियो गोर ही मैत्री आणखी पुढे नेतील, असं म्हणत ट्रम्प यांनी व्यापार कराराचे संकेत दिले.
अमेरिका भारतावरील टॅरिफ कमी करणार?
अमेरिका भारतीय आयातीवरील कर कमी करण्याचा विचार करेल का? असा प्रश्न पत्रकारांनी विचारला असता ट्रम्प म्हणाले की, “बरं, सध्या रशियन तेलामुळे भारतावर कर खूप जास्त आहेत आणि त्यांनी रशियन तेल घेणं बंद केलं आहे, किंवा ते खूप कमी केलं आहे. हो, आम्ही कर कमी करणार आहोत”, असे संकेत डोनाल्ड ट्रम्प यांनी दिले आहेत.
