Gyanvapi Masjid Case : वुजूच्या परवानगीसाठी मुस्लीम पक्षकार सर्वोच्च न्यायालयात, रमजानमुळे सुनावणी १४ एप्रिलला

हुजेफा अहमदी यांनी म्हटले की “हा रमजानचा महिना आहे त्यामुळे मशिदीच्या आवारात नमाज अदा करता आली पाहिजे.” त्यावर सरन्यायाधीश चंद्रचूड यांनी यासंदर्भात अंतरिम अर्ज दाखल करण्यास सांगितले. अहमदी खंडपीठासमोर म्हणाले की, “तुमच्या आदेशानंतर संपूर्ण परिसर सील करण्यात आला आहे. तसेच मागील बाजूस बाथरूम आहे, तेदेखील सील करण्यात आलं आहे.”

या प्रकरणाची सुनावणी २१ एप्रिल रोजी होणार होती. परंतु अहमदी खंडपीठासमोर म्हणाले की, सध्या रमजानचा महिना सुरू आहे, त्यामुळे तुम्ही जर ही सुनावणी आधी घेतली तर बरं होईल. त्यावर न्यायमूर्तींनी होकार दर्शवत ही सुनावणी १४ एप्रिल घेऊ असे सांगितले. तसेच तुम्ही वजू करण्यासंदर्भात मूळ याचिकेत अंतरिम अर्ज का दाखल करत नाही? असेही न्यायमूर्ती म्हणाले. चंद्रचूड यांनी सांगितले की, आम्ही १४ एप्रिल ही तारीख अंतरिम याचिकेसाठी सूचीबद्ध करतो. तुम्ही केवळ एक अंतरिम अर्ज दाखल करा. एका कनिष्ट वकिलाकडून त्यात उल्लेख करून घ्या. त्यानंतर आपण १४ तारखेला सुनावणी घेऊ.