Honor Killing : “तू दलित आहेस माझ्या बहिणीवर प्रेम करायची हिंमत कशी झाली?”, दलित तरुणाच्या हत्येआधी काय घडलं?

नेमकी घटना काय घडली?

रविवारी कवीन त्याच्या मैत्रिणीला म्हणजेच सुबाशिनीला भेटायला केटीसी नगर या भागात पोहचला होता. त्यावेळी सुबाशिनीचा भाऊ सुरजीत त्याला भेटायला आला. त्याने कवीनला सांगितलं की आई-बाबांना तुझ्याशी बोलायचं आहे. कवीनला त्याने विश्वासात घेतलं. ज्यानंतर कवीन त्याच्याबरोबर बाईकवर बसून निघाला. पुढे गेल्यानंतर काही वेळातच सूरजीतने बाईक थांबवली. त्यानंतर कवीनवर खेकसला आणि म्हणाला तू खालच्या जातीचा आहेस तू माझ्या बहिणीवर प्रेम करण्याची हिंमतच कशी केलीस? असं म्हणत सूरजीतने पाठीमागे लपवलेला कोयता काढला आणि त्याने कवीनवर वार केले. कवीन जीव वाचवून पळाला खरा. पण २०० मीटर पेक्षा जास्त अंतर सूरजीतने त्याचा पाठलाग केला आणि त्याच्यावर वार केले. ज्यात कवीनचा मृत्यू झाला. ही संपूर्ण घटना एका रुग्णालयाजवळ घडली आहे. येणाऱ्या जाणाऱ्या लोकांनी ही घटना पाहिली. इंडियन एक्स्प्रेसने हे वृत्त दिलं आहे.

सूरजीतचे आई वडील पोलीस

आरोपी सूरजीतचे आई वडील हे दोघंही पोलीस खात्यात सब इन्स्पेक्टर पदावर कार्यरत आहेत. कवीन आणि सुबाशिनी यांचं एकमेकांवरचं प्रेम या दोघांनाही मान्य नव्हतं. त्यांनी सुबाशिनीला भेटू नकोस म्हणून काही वेळा कवीनला धमकावलं होतं. दरम्यान सूरजीतने घटनास्थळावरुन पळ काढला. पण नंतर तो स्वतःच पलायमकोट्टई पोलीस ठाण्यात पोहचला आणि त्याने आत्मसर्मपण केलं. सूरजीतच्या विरोधात हत्येचा गुन्हा दाखल करण्यात आला आहे.

कवीनच्या कुटुंबाने मृतदेह स्वीकारण्यास दिला नकार

दरम्यान कवीनचा मृतदेह घेण्यास त्याच्या नातेवाईकांनी नकार दिला आहे. कवीनची आई एस तमिळसेल्वीने आरोप केला आहे की आरोपीचे आई वडील पोलीस आहेत. त्यामुळे ते दोघंही या प्रकरणांत दबाव टाकू शकतात. दरम्यान या घटनेने तामिळनाडू हादरलं आहे. या घटनेनंतर दलित संघटनांनी आंदोलन करत सूरजीतच्या आई वडिलांनाही अटक झाली पाहिजे अशी मागणी केली आहे.