गोलंदाजांनी केलेल्या भेदक माऱ्याच्या जोरावर केन विल्यमसनच्या न्यूझीलंडने २०१९ विश्वचषक स्पर्धेत अंतिम फेरीत प्रवेश केला आहे. अखेरच्या षटकांपर्यंत रंगलेल्या सामन्यात न्यूझीलंडने भारतावर १८ धावांनी मात केली. भारताचा संघ २२१ धावांपर्यंतच मजल मारु शकला. २४० धावांचा पाठलाग करताना भारताचा डाव कोलमडला, मात्र रविंद्र जाडेजा आणि महेंद्रसिंह धोनी यांनी सातव्या विकेटसाठी महत्वाची भागीदारी रचत सामन्यात रंगत निर्माण केली. मात्र अखेरच्या षटकात झटपट धावा करणं भारतीय फलंदाजांना जमलं नाही. रविंद्र जाडेजा आणि धोनीच्या मोक्याच्या क्षणी माघारी परतल्यामुळे भारताचा संघ बॅकफूटला ढकलला गेला.
रविंद्र जाडेजाने ७७ तर धोनीने ५० धावा केल्या. या पराभवासह भारताचं विश्वचषक स्पर्धेतलं आव्हानही संपुष्टात आलं आहे. न्यूझीलंडकडून मॅट हेन्रीने ३, मिचेल सँटनरने-ट्रेंट बोल्टने २-२ तर फर्ग्युसन आणि निशमने १-१ बळी घेतला. भारताचा एक फलंदाज धावबाद झाला.
पहिल्या उपांत्य सामन्यात न्यूझीलंडने अखेरीस २३९ धावांपर्यंत मजल मारली. मंगळवारी पावसाच्या व्यत्ययामुळे सामना ४६.१ षटकांवर थांबवण्यात आला. न्यूझीलंडने मंगळवारी २११ धावांपर्यंत मजल मारली होती. याच धावसंख्येवरुन आजच्या दिवसाचा सुरुवात झाली. न्यूझीलंडचे फलंदाज आजच्या दिवसात फक्त २८ धावांची भर घालू शकले. रॉस टेलर आणि टॉम लॅथम यांना झटपट माघारी धाडण्यात भारतीय गोलंदाज यशस्वी ठरले. दरम्यान आज दिवसाच्या उत्तरार्धात पावसाची शक्यता वर्तवण्यात येत असल्यामुळे भारतीय फलंदाज हे आव्हान कसं पूर्ण करतात हे पहावं लागणार आहे. न्यूझीलंडकडून अनुभवी टॉम लॅथमने ७४ धावांची खेळी केली. भारताकडून भुवनेश्वर कुमारने ३ बळी घेतले. त्याला अन्य गोलंदाजांनी १-१ बळी घेत चांगली साथ दिली.
नाणेफेक जिंकून सामन्यात पहिल्यांदा फलंदाजी करण्याचा न्यूझीलंडचा निर्णय काहीसा फसला. सलामीवीर मार्टीन गप्टील अवघ्या एका धावेवर माघारी परतला. जसप्रीतच बुमरहाने त्याचा बळी घेतला. यानंतर कर्णधार केन विल्यमसन आणि हेन्री निकोलस यांनी संघाचा डाव सावरण्याचा प्रयत्न केला. मात्र रविंद्र जाडेजाने हेन्री निकोलसचा त्रिफळा उडवत न्यूझीलंडची जमलेली जोडी फोडली. यानंतर मैदानात आलेल्या अनुभवी रॉस टेलरने कर्णधार विल्यमसनच्या साथीने न्यूझीलंडच्या डावाला आकार दिला. दोघांनीही तिसऱ्या विकेटसाठी अर्धशतकी भागीदारीही केली. कर्णधार विल्यमसनने भारतीय गोलंदाजांचा नेटाने सामना करत अर्धशतकही झळकावलं. मात्र चहलच्या गोलंदाजीवर रविंद्र जाडेजाकडे झेल देत तो माघारी परतला. त्याने ६७ धावांची खेळी केली. विल्यमसन माघारी परतल्यानंतर रॉस टेलरने डावाची सुत्र आपल्या हातात घेतली. जिमी निशम आणि कॉलिन डी-ग्रँडहोमही झटपट माघारी परतले. मात्र टेलरने एक बाजू लावून धरत अर्धशतक झळकावलं.
युजवेंद्र चहल निशमच्या गोलंदाजीवर माघारी, न्यूझीलंडचा संघ अंतिम फेरीत दाखल
फर्ग्युसनने घेतला बळी
मोक्याच्या क्षणी गप्टीलच्या अचूक फेकीवर धोनी धावबाद, भारताच्या आशांवर पाणी
ट्रेंट बोल्टच्या गोलंदाजीवर उंच फटका खेळण्याच्या प्रयत्नात धोनी विल्यमसनकडे झेल देत माघारी
न्यूझीलंडच्या गोलंदाजांचा नेटाने सामना करत, जाडेजाने गरजेच्या वेळी फटकेबाजी करत आपलं अर्धशतक झळकावलं आहे.
सातव्या विकेटसाठी अर्धशतकी भागीदारी करत धोनी-जाडेजाने भारताच्या आशा जिवंत ठेवल्या आहेत.
मिचेल सँटरनरच्या गोलंदाजीवर उंच फटका खेळण्याच्या प्रयत्नात हार्दिक पांड्या विल्यमसनच्या हाती झेल देत माघारी
मिचेल सँटनरच्या गोलंदाजीवर मोठा फटका खेळण्याच्या प्रयत्नात पंत, डी-ग्रँडहोमकडे झेल देऊन माघारी.
पंतची हार्दिक पांड्यासोबत ४७ धावांची भागीदारी, न्यूझीलंडच्या गोलंदाजांचा सामना करताना केल्या ३२ धावा
पहिले ४ फलंदाज माघारी परतल्यानंतर दोन्ही फलंदाजांनी न्यूझीलंडच्या गोलंदाजांचा नेटाने सामना करत भारतीय डावाला आकार देण्याचं काम केलं आहे.
जिमी निशमने घेतला कार्तिकचा झेल, भारताला चौथा धक्का
मॅट हेन्रीच्या गोलंदाजीवर राहुल झेलबाद, भारतीय संघ अडचणीत
ट्रेंट बोल्टच्या गोलंदाजीवर विराट कोहली पायचीत, भारताचा महत्वाचा फलंदाज माघारी परतला
मॅट हेन्रीच्या गोलंदाजीवर रोहित झेलबाद, भारताचा पहिला गडी माघारी परतला
भारताला विजयासाठी २४० धावांचं आव्हान
भुवनेश्वर कुमारच्या गोलंदाजीवर उंच फटका खेळण्याच्या प्रयत्नात हेन्री माघारी
चोरटी धाव घेताना टेलर रविंद्र जाडेजाच्या गोलंदाजीवर धावबाद
तर भुवनेश्वर कुमारच्या गोलंदाजीवर मोठा फटका खेळण्याच्या प्रयत्नात लॅथम झेलबाद. न्यूझीलंडचे सात गडी माघारी
दोन्ही संघाचे खेळाडू मैदानात दाखल
दोन्ही संघाचे खेळाडू मैदानात दाखल
मँचेस्टरमध्ये आता पावसाने उसंत घेतली असली तरीही, उत्तरार्धात पाऊस हजेरी लावण्याची शक्यता वर्तवली जात आहे. अद्यापही मँचेस्टरमधलं वातावरण ढगाळ आहे