Iran-Israel War Highlights: अयातुल्ला खामेनींना हत्येची भीती, बंकरमध्ये आश्रय; उत्तराधिकाऱ्याची घोषणा होणार

इराणवर इस्रायलकडून जोरदार हल्ले केले जात आहेत. या पार्श्वभूमीवर आता इराणचे सर्वोच्च नेते अयातुल्ला खामेनी यांची हत्या होण्याची शक्यता वर्तविली जात आहे. त्यामुळे त्यांनी बंकरमध्ये आश्रय घेतला आहे. त्यांनी इलेक्ट्रॉनिक्स उपकरणांद्वारे संवाद साधणे सोडले असून आपल्या विश्वासू लोकांमार्फतच ते बोलत आहेत. तसेच त्यांचा उत्तराधिकारी नेमण्याचीही प्रक्रिया सुरू करण्यात येणार आहे.

इराणचे परराष्ट्र मंत्री अब्बास अरघची यांनी सांगितले की, इस्रायबरोबर सुरू असलेल्या संघर्षात अमेरिकेने सहभाग घेतल्यास जगासाठी धोका निर्माण होईल. इस्तंबूलमध्ये पत्रकारांशी बोलताना, अरघटी यांनी अमेरिकेची कारवाई अत्यंत दुर्दैवी असेल, असे म्हटले.

भारताने इराणमधून आतापर्यंत ५१७ भारतीय नागरिकांना बाहेर काढले आहे. तर इराणमधील भारतीय दूतावासाने जाहीर केले की, नेपाळ आणि श्रीलंकेमधील नागरिकांनाही बाहेर काढण्यात भारत मदत करणार आहे.

https://twitter.com/India_in_Iran/status/1933344587919028434

इराणच्या मशहाद येथून भारतातील २९० विद्यार्थ्यांना सुरक्षितपणे शुक्रवारी मायदेशी आणण्यात आले. ऑपरेशन संधूद्वारे इराणमध्ये अडकलेल्या भारतीयांना परत आणण्याची मोहीम हाती घेण्यात आली आहे. आजही आणखी दोन विमाने येणार आहेत. परतलेल्या विद्यार्थ्यांपैकी बहुतेकजण जम्मू-काश्मीरमधील असल्याचे सांगितले जाते.