Israel-Iran War Updates: गेल्या काही दिवसांपासून इस्रायल व इराणमधील संघर्ष विकोपाला गेल्याचं दिसून येत आहे. दोन्ही बाजूंनी एकमेकांवर आक्रमकपणे हल्ले केले जात आहेत. इस्रायल-इराण संघर्षाच्या आठव्या दिवशीही हे युद्ध थांबण्याची कोणतीही चिन्हं दिसत नाहीयेत. एकीकडे अमेरिकेचे राष्ट्राध्यक्ष डोनाल्ड ट्रम्प यांनी बिनशर्त संपूर्ण शरणागतीची अट इराणसमोर ठेवली आहे. तसेच, इराणचे सर्वोच्च नेते अयातुल्लाह अली खोमेनी यांना मारण्यासंदर्भातही ट्रम्प यांनी इशारा दिल्यानंतर खुद्द खोमेनींनी आक्रमक प्रत्युत्तर दिलं. आता इराणच्या राष्ट्राध्यक्षांनीच या संघर्षावर भूमिका स्पष्ट केली आहे.
काय म्हणाले इराणचे अध्यक्ष?
अमेरिकेचे राष्ट्राध्यक्ष डोनाल्ड ट्रम्प यांनी इराणचे सर्वोच्च नेते अयातुल्लाह खोमेनी यांना कधीही ठार मारू शकतो अशा आशयाचं विधान केल्यानंतर खोमेनींनी ‘आता युद्ध सुरू’ अशी भूमिका घेत दोन्ही देशांमध्ये युद्धाची घोषणा केली. एकीकडे डोनाल्ड ट्रम्प यांनी इराणला बिनशर्त शरणागती पत्करण्याचा अल्टिमेटम दिलेला असताना तो फेटाळून लावत आता उलट इराणच्या अध्यक्षांनी इस्रायलकडून हल्ले थांबवण्यासंदर्भात विधान केलं आहे.
“इस्रायलकडून येणाऱ्या दहशतवाद्यांना कायमचं थांबवण्यासंदर्भात इराणला आता ठोस आणि आश्वासक पावलं उचलणं आवश्यक आहे. इराणवर थोपवण्यात आलेलं हे युद्ध संपवण्याचा आता एकमेव पर्याय म्हणजे शत्रूला बिनशर्त माघार घ्यायला लावणं”, अशी ठाम भूमिका इराणचे राष्ट्राध्यक्ष मसूद पेझेश्कियन यांनी घेतली आहे.
इराणमधील आण्विक तळ लक्ष्य!
इस्रायलनं इराणमध्ये हल्ला केल्याच्या पहिल्या दिवसापासून इराणमधील आण्विक तळ लक्ष्य केल्याचा दावा केला आहे. मात्र, आण्विक प्रकल्पांसोबतच इस्रायलनं इराणची राजधानी तेहरानवर हवाई हल्ले चढवले आहेत. याशिवाय अरक व खांदाब या ठिकाणी असणाऱ्या इराणच्या आण्विक प्रकल्पांचंही मोठं नुकसान केल्याचा दावा इस्रायलनं केला आहे. दुसरीकडे इराणनं केलेल्या हल्ल्यात मोठ्या प्रमाणावर नागरी वस्तीचं नुकसान झाल्याचा आरोप इस्रायलनं केला आहे. बुधवारी इराणनं डागलेल्या क्षेपणास्त्रामुळे इस्रायलमधील एका रुग्णालयाचं मोठं नुकसान झालं. त्याशिवाय, तेल अवीवमधील काही ठिकाणीही इराणनं ड्रोन व क्षेपणास्त्रांच्या माध्यमातून हल्ले करून मोठं नुकसान केल्याचा दावा इस्रायलनं केला आहे.
इराणमधील तेल उत्पादनावर युद्धाचा परिणमाम
इराण व इस्रायलमध्ये पेटलेल्या युद्धात आत्तापर्यंत १ हजाराहून जास्त नागरिकांचा बळी गेल्याचा अंदाज व्यक्त केला जात आहे. त्याचबरोबर १३०० हून अधिक नागरिक जखमी झाले आहेत. याव्यतिरिक्त मोठ्या प्रमाणावर वित्तहानी झाल्याचा अंदाज आहे. जीवित व वित्तहानीबरोबरच इराणमधील तेल उत्पादनावरही युद्धाचा परिणाम झाल्यामुळे आंतरराष्ट्रीय बाजारपेठेत कच्च्या तेलाच्या किमती वाढण्याची शक्यता आहे.
