Israel Iran conflict: इराणच्या अणु प्रकल्पावर इस्रायलचा हल्ला; संरक्षण मंत्रालयाचे मुख्यालयही लक्ष्य

इस्रायलच्या संरक्षण दलाने आज एक्सवर एक पोस्ट केली आहे. त्या पोस्टमध्ये त्यांनी म्हटले आहे की, “इस्रायली संरक्षण दलाने आज तेहरानमधील इराणी अण्वस्त्र प्रकल्पाशी संबंधित विविध ठिकाणांवर हल्ले केले. या कारवाईत इराणच्या संरक्षण मंत्रालयाचे मुख्यालय, अण्वस्त्र संशोधनाशी संबंधित एसपीएनडी प्रकल्पाचे केंद्र आणि इतर महत्त्वाची ठिकाणे लक्ष्य करण्यात आली.”

इराणने दिलेल्या माहितीनुसार तेहरानमधील शाहरान तेल डेपोवर इस्रायली हल्ला झाला असून, परिस्थिती नियंत्रणात आहे. राजधानीजवळील एका तेल शुद्धीकरण केंद्रावर इस्रायली हल्ल्यानंतर आगही लागली. इराणच्या तस्निम वृत्तसंस्थेनुसार, इस्रायलने तेहरानमधील संरक्षण मंत्रालयाच्या इमारतीवरही हल्ला केला असून, त्यात किरकोळ नुकसान झाले.

इराणच्या अणुस्थळांवर इस्रायलने केलेल्या हल्ल्यांमुळे तणाव निर्माण झाला असून, ज्यामध्ये ७८ लोकांचा मृत्यू झाला आणि ३२० हून अधिक लोक जखमी झाले, असे इराणच्या संयुक्त राष्ट्रातील राजदूताने सांगितले. त्यांनी सांगितले की, या कारवाईत जनरल आणि शास्त्रज्ञांना लक्ष्य केले गेले होते, तरीही बहुतेक बळी नागरिक होते. इराणने इस्रायलला लक्ष्य करून दोन लांब पल्ल्याच्या क्षेपणास्त्रांनी या प्रत्युत्तर दिले, दोन्ही हल्ल्यांमध्ये किमान ४१ लोक जखमी झाले आहेत.

अमेरिकेसोबत सुरू असलेल्या अणु चर्चेतून इराणची माघार

दरम्यान, इस्रायलकडून झालेल्या या हल्ल्यांनंतर लगेचच, इराणने अमेरिकेसोबत सुरू असलेल्या अणु चर्चेतून माघार घेण्याची औपचारिक घोषणा केली आहे. इराणच्या परराष्ट्र मंत्रालयाने एका निवेदनात म्हटले आहे की, अशा ‘आक्रमक आणि चिथावणीखोर कृत्या’नंतर, कोणत्याही चर्चेसाठी कोणताही आधार उरलेला नाही. यावर अमेरिकेचे अध्यक्ष डोनाल्ड ट्रम्प यांनी सोशल मीडियावर पोस्ट करत म्हटले आहे की, जर इराणला तडजोड करायची असेल तर त्यांच्याकडे अजूनही दुसरी संधी आहे.