हरियाणामध्ये जाट आंदोलनाला हिंसक वळण, उप-पोलीस अधीक्षक जखमी

त्याच वेळी दिल्लीतील जंतर मंतर येथे १,००० च्या वर आंदोलकांनी निदर्शने केली. तर फतेहाबाद तसेच हरियाणातील इतर भागातून आंदोलक दिल्लीकडे येत होते. त्यामुळे दिल्लीकडे येणाऱ्या रस्त्यांवर बॅरीकेड्स लावलेल्या होत्या.  आंदोलनाच्या ठिकाणी पोलिसांचा ताफा दाखल झाला आहे. प्रतिबंधात्मक कारवाई म्हणून पेट्रोल पंपांना खास सूचना देण्यात आल्या आहेत. काही जिल्ह्यांमध्ये जमावबंदीचे आदेश देण्यात आले आहेत. रेल्वे, महामार्ग इत्यादी ठिकाणी पोलिसांचा पहारा वाढवण्यात आला आहे. ट्रॅक्टरमध्ये बसून प्रवास करण्यास बंदी घालण्यात आली आहे. अनेक ठिकाणी लोक ट्रॅक्टरच्या ट्रॉलीत बसून दिल्लीकडे रवाना होऊ लागले होते.

त्यांना थांबण्याचे आवाहन पोलिसांनी केले आहे. सोमवार पासून हरियाणामध्ये सीबीएसई बोर्डाच्या परीक्षा आहेत. या गोंधळामुळे विद्यार्थ्यांना परीक्षेला कसे जायचे हा प्रश्न निर्माण झाला आहे. सर्व विद्यार्थ्यांना परीक्षेला न भिता जाता येईल अशी आम्ही व्यवस्था करू असे पोलिसांनी म्हटले आहे. दरम्यान जाट आरक्षण संघर्ष समितीचे प्रमुख यशपाल मलिक यांना चर्चेसाठी निमंत्रण देण्यात आले आहे. त्यांच्यासोबत २०-३० इतर जाट नेते देखील जाणार आहेत. जाट समाजाला नोकरी आणि शिक्षणात आरक्षण मिळावे म्हणून हरियाणामध्ये तीव्र स्वरुपाचे आंदोलन होत आहे. गेल्या कित्येक वर्षांपासून हा प्रश्न हरियाणामध्ये आहे. गेल्या काही महिन्यांमध्ये या आंदोलनाने उग्र स्वरुप धारण केले आहे. रेल्वे रुळ उखडणे, महामार्ग अडवणे, सार्वजनिक मालमत्तेचे नुकसान करणे यासारख्या घटना घडत आहेत.