बाबा केदारनाथ यांच्या दर्शनाची आतूरता आता संपली आहे. गेल्या दोन वर्षांपासून करोनाच्या प्रादुर्भावामुळे केदारनाथ मंदिर बंद होते. परंतु अक्षय्य तृतीयेच्या शुभ मुहूर्तावर गंगोत्री आणि यमुनोत्री धामचे दरवाजे भाविकांसाठी उघडण्यात आले. तसेच आज शुक्रवारी सकाळी ६.२५ वाजता शुभ मुहूर्तावर केदारनाथ मंदिराचे दरवाजे भाविकांसाठी उघडण्यात आले. उत्तराखंडचे मुख्यमंत्री पुष्कर सिंह यांच्या हस्ते पूजा करण्यात आली. यावेळी पहिली पूजा ही पंतप्रधान नरेंद्र मोदींच्या नावाने करण्यात आली. आज केदारधाममध्ये मोठ्या संख्येने भाविक दाखल झाले होते. भाविकांना करता येणार पूजा करोनामुळे गेल्या दोन वर्षापासून केदारनाथ मंदिर बंद ठेवण्यात आले होते. त्यामुळे भाविकांना दर्शन घेण्यास बंदी घालण्यात आली होती. मात्र, आता मंदिराचे दरवाजे उघडल्यामुळे भाविकांना दर्शनासोबतच पूजाही करता येणार आहे. शंकराचार्यांच्या मूर्तीचेही घेता येणार दर्शन केदारनाथ धाममध्ये प्रथमच आदिगुरू शंकराचार्यांच्या समाधीत शंकराचार्यांच्या मूर्तीचे दर्शनही भाविकांना पाहायला मिळणार आहे. २०१३ च्या महापूरात ही जागा नष्ट झाली होती, जी पुन्हा बांधण्यात आली आहे. पंतप्रधान नरेंद्र मोदी यांनी गेल्या वर्षी या समाधीस्थळाला भेट दिली होती. देश-विदेशातून हजारो भाविक दाखल देश-विदेशातून हजारो भाविक केदारनाथ धाममध्ये पोहोचले आहेत. थंडी असूनही मंदिराचे दरवाजे उघडण्यापूर्वीच गुरुवारी रात्री उशिरापासून भाविकांनी मंदिरात गर्दी केली होती. सकाळी सरस्वती नदीपर्यंत भाविकांची गर्दी दिसून आली. यावेळी सेल्फी आणि फोटो काढण्याची स्पर्धाही लोकांमध्ये पाहायला मिळाली. अनेकजण आपल्या कुटुंबीयांना फोनवरून बाबांचे दर्शन देताना दिसत होते. उत्सवास सुरूवात गुरुवारी बाबांची चालविग्रह उत्सव डोली केदारनाथ धाम येथे पोहोचली. हजारो भाविक आणि भोलेनाथच्या जयघोषात डोली धामवर पोहोचली. शुक्रवारी सकाळी बाबांचे दरवाजे उघडल्यानंतर ही डोली मंदिरात आणण्यात आली. रात्रभर ही डोली विसाव्यासाठी मंदिराच्या भांडारात ठेवण्यात आली होती.